Përderisa dimri po i shtrëngon dhëmbët në Amerikë dhe shumë pjesë të Evropës në rajonin tonë veç po rriten temperaturat. Masa ajrore mjaft të ngrohta për këtë periudhë kohore me origjinë nga Mesdheu dhe Afrika Veriore po depërtojnë në rajonin tonë për momentin të shoqëruara edhe me masa ajrore të thata anticiklonike të cilat në kombinim po kushtëzojnë mot të vërtetë pranveror me shumë rreze diellore.
Moti mjaft i nxehtë për këtë periudhë kohore do të mbajë edhe nesër dhe pasnesër. Pasnesër një ciklon i fuqishëm nga Altantiku do të depërtojë në Italinë veriore dhe do të fillojë të ndikojë në rajonin tonë por temperaturat mbesin të larta. Ky ciklon gjatë natës do të fillojë të distribuojë edhe reshje shiu, vende-vende rrebeshe me vetëtima dhe bubullimë.
Nga e hëna mot gjithnjë e më jo-stabil, por ende i ngrohtë për këtë periudhë kohore. Priten reshje të herëpashershme shiu, erëra të fuqishme jugore dhe vende-vende rrebeshe shiu me vetëtima dhe bubullimë.
Në fund të themi se kjo “valë nxehtësie” nuk nënkupton se dimri ka përfunduar, bile është larg së përfunduari për arsye se ajri arktik i rrethit polar është mjaft i shpërndare në hemisferën veriore dhe nëse gjene rrugën për rajonin tonë atëherë mund të kemi goditje të fortë dimërore. Kjo ende mbetet mjaft enigmatike sepse modelet kompjuterike “kalërojnë” nga një ekstrem në tjetrin dhe nevojitet kohë deri të stabilizohen në simulimet e tyre./Meteoballkan
