Masat e fuqishme ajrore ciklonike po largohen gradualisht dhe tani kemi rritjen graduale të presionit atmosferik, gjegjësisht fuqizimin e mases ajrore anticiklonike e cila do të fillojë të dëbojë vranësirat nga rajoni ynë duke mundësuar lokalisht të ketë intervale kohore me diell orëve të vonshme të pasdites.
Kthjellimi i motit që pritet gjatë natës dhe masa mjaft e ftohtë ajrore mund të kushtëzojnë acar të lehtë në vende të ndryshme të rajonit, sidomos në zonat kodrinore-malore, por duke mos përjashtuar edhe disa zona të ulëta të viseve tona kontinentale.
Gjatë ditëve të enjte dhe të premte pritet mot më stabil dhe me intervale të gjata kohore me diell. Po ashtu priten edhe vranësira lokale, ndërsa temperaturat shënojnë rritje edhe pse jo në masë të duhur për këtë periudhë kohore.
Rrebeshet lokale të shiut rikthehen përsëri në zonat tona kontinentale, ndërsa në zonat bregdetare priten më shumë rreze diellore gjatë fundjavës, me temperatura maksimale rreth 20 gradë Celsius./METEOBALLKAN
