Masa ajrore anticiklonike po fuqizohet në pjesë të Evropes dhe drejt viseve tona, megjithatë ende priten reshje të dobëta atmosferike, ndërsa një masë paksa më e ftohtë ajrore po vjen në periferi të kësaj mase ajrore anticiklonike duke u zhvendosur në drejtim të viseve tona.
Temperaturat do të pësojnë ulje sidomos mbrëmjen e së Enjtes me erëra të ftohta nga veriu, por asgjë ekstreme dhe reshjet do të jenë të dobëta dhe të karakterit lokal. Përpos rigave të dobëta (vende-vende) të shiut mund të kemi edhe fjolla bore përpos viseve malore edhe në disa zona më të ulëta, por të gjitha do të jenë të dobëta. Vetëm në disa vise të Shqipërisë priten reshja paksa më intensive shiu.
Të Premten do të jemi nën ndikimin e masës së fuqishme ajrore anticiklonike. Mëngjesi do të jetë mjaft i ftohtë, vende-vende me acar afërsisht deri në -5 gradë Celsius, ndërsa dita me diell me temperatura deri në 5 apo 6 gradë Celsius (Kosovë). Njëkohësisht do të kemi afrimin e një fronti i cili në fundjavë sjellë reshje të reja atmosferike. Fillimisht do të ketë rritje të lehta të temperaturave gjatë së shtunës, ndërsa të dielën vonë dhe të hënën prapë ulje e temperaturave dhe riga shiu e fjolla bore në disa zona. Shumica e reshjeve do të jetë në formë shiu. Borë në viset kodrinore-malore, por në fillim të javës së re reshje afatshkurtra bore mund të ketë edhe në disa ultësira të Kosovës. Reshjet do të jenë të pakta në përgjithësi.
Pra, para nesh një mot ende i ndryshueshëm dhe pak më i ftohtë. Përpos të Premten ku pritet mot i kthjellët ditëve tjera do të ketë vranësira të shpeshta. Temperaturat pësojnë ulje graduale sidomos mbrëmjen e së Enjtes me ardhjen e një fronti të dobët, të ftohtë ajror.
Fundjava me reshje lokale kryesisht shiu e borë në viset kodrinore-malore. Pas rritjes së përkohshme të temperaturave të dielen vonë e sidomos të Hënën ulje sërishme e temperaturave me reshje lokale bore kryesisht të dobëta./MeteoBallkan
