Afër jugut të Detit Tiren, përtej Italisë gjendet vorbulla e ciklonit të fuqishëm i cili po kushtëzon reshje të dendura shiu në rajonin tonë. Ky ciklon ka shtrirje në një territor mjaft të madh dhe të gjerë të Mesdheut dhe vranësirat në kuadër të këtij cikloni janë edhe mbi Kosovë, Shqipëri dhe Maqedoninë Veriore.
Një tjetër vorbullë ciklonike gjendet për momentin në Gadishullin Iberik gjegjësisht afër Spanjës dhe Portugalisë.
Në anën tjetër në pjesën veriore, veriperëndimore, qendrore dhe Skandinavi gjendet anticikloni i fuqishëm i cili kushtëzon mot të kthjellët dhe stabil në këto vise.
Kthjelltësia në kuadër të këtij anticikloni shtrihet deri në Vojvodinë dhe kjo kthjelltësi do të shtrihet gradualisht nga nesër në mbrëmje edhe në disa pjesë të Republikës së Kosovës pasi që nga nesër pritet që reshjet e shiut të ndërpriten gradualisht.
Pra, reshjet e shiut në Kosovë do të vazhdojnë edhe sonte gjatë natës dhe lokalisht edhe gjatë ditës së nesërme, megjithatë pasdite vonë ose në mbrëmje moti pritet të kthjellohet fillimisht në verilindje të vendit. Përderisa reshjet do të pushojnë në Kosovë ato do të vazhdojnë në shumë pjesë të Shqipërisë, veçanërisht në gjysmën jugore të vendit deri të premtën./Meteoballkan
