Rajoni ynë gjendet nën ndikimin e masave ajrore anticiklonike me qendër në Mesdhe, ndërsa një anticiklon tjetër po depërton nga Atlantiku, përmes Britanisë së Madhe dhe Evropës qendrore në drejtim të rajonit tonë dhe pastaj në drejtim të Evropës verilindore.
Në anën tjetër mes këtyre masave ajrore kemi një front të dobët të ftohtë ajror i cili pritet të na sjellë vranësira dhe riga të dobëta lokale shiu. Erërat kanë filluar të fryjnë nga veriu dhe verilindja dhe nga nesër do të fillojë edhe ulja graduale e temperaturave. Gjatë natës në Kosovë priten riga të dobëta lokale shiu, ndërsa ditëve të ardhshme do të kemi vranësira, por gjithashtu edhe intervale kohore diellore gjatë ditës. Vranësirat në disa rajone do të jenë të shtresave të ulëta atmosferike dhe mund të mbesin gjatë pjesës më të madhe të ditës.
Pra, edhe ditëve të ardhshme na pret mot pak i ndryshueshëm, varësisht nga rajoni në rajon, me vranësira, intervale kohore diellore, ulje kryesisht të lehta të temperaturave dhe gjithashtu do të ketë gjasa edhe për mjegull dhe vranësira të ulëta. Reshjet atmosferike do të jenë sporadike dhe të karakterit lokal/Meteoballkan
Main Image by: Meteociel
