Pas valës së fortë të të nxehtit veror fronti i ftohtë uli temperaturat dhe përjetuam disa ditë mjaft të këndshme, ngase i nxehti ishte kogja i rëndë. Rrebeshet e mëdha dhe stuhitë e shiut fatmirësisht nuk zgjatën shumë, ndërsa pas stuhive të shiut në shumë rajone ra shi i ngadalshëm dhe shumë i dobishëm.
Pas frontit të ftohtë depërtuan temperatura dukshëm më të ulëta të cilat ende janë prezente, ndërsa nga E Premtja do të fillon rritja e temperaturave.
Masat ajrore anticiklonike do të fuqizohen për të na garantuar mot stabil dhe të këndshëm veror, megjithatë temperaturat do të vazhdojnë të rriten sidomos në fundjavë kur edhe mund të fillojë një valë e re nxehtësie, ngase temperaturat maksimale edhe në Kosovë do të shkojnë pak mbi 30 gradë Celsius.
Edhe në Evropë gjendja është dukshëm më e qetë, por stuhi të fuqishme lokale sot ka në territorin e Greqisë dhe larg në Rusi. Stuhi të izoluara ka edhe në Turkiye, ndërsa reshje shiu ka në Skandinavi dhe Britaninë e Madhe ku temperaturat kanë pësuar ulje të mëdha. Në malet Skoceze janë regjistruar edhe reshje bore.
Pas stuhive shumë të fuqishme gjendja është përmirësuar edhe në Evropë, por stuhitë lokale mund të rikthehen shumë shpejtë me depërtime të reja nga Atlantiku dhe kontakti me ajrin e ngrohtë veror që do të përhapet në Kontinent. Në viset tona njëherë për njëherë nuk pritet ndonjë destabilizim i madh i motit, por krejt në fundjavë dhe fillim të javës së re mund të kemi depërtimin e një fronti të ftohtë ajror i cili nga tani duket i dobët.
Ky front mund të shkaktojë destabilizim të motit, por shikuar nga tani duket se rrebeshet do të jenë të izoluara dhe nuk pritet ndonjë stuhi e madhe./MeteoBallkan
