Një front i dobët i ftohtë ajror po “parakalon” sot mbi territorin e Republikës së Kosovës me vranësira lokale dhe ndonjë rigë shiu vetëm në disa vise të caktuara. Fronti shumë pak po ndikon në gjendjen atmosferike, por nuk po lejon rritjen e temperaturave, ndërsa edhe orëve të ardhshme nuk pritet ndonjë ndryshim sepse fronti është tejet i dobët dhe ma ndonjë gjasë për ndonjë ndryshim të gjendjes kryesisht të qetë atmosferike.
Vazhdon ndikimi i plotë anticiklonik që kushtëzon mot të thatë në këtë periudhë të thatë të vitit, megjithatë një tjetër front po shihet në horizont nga disa modele që pritet të formohet ditën e Enjte. Ende ka paqartësi rreth këtij sistemi frontal, por duket sikur ky front i fuqishëm me rrebeshe intensive do të formohet në Bosnjë dhe Hercegovinë dhe Mal të Zi. Gjithsesi disa shtrëngata pritet të krijohen edhe në territorin e Republikës së Kosovës sidomos në rajonet afër Malit të Zi, por mund të ndodhë edhe më thellë brenda territorit të Kosovës.
Disa zhvillime të Enjten pasdite parashihen edhe në veri të Shqipërisë, pastaj në lindje-juglindje dhe perëndim të Maqedonisë së Veriut. Këto zhvillime nuk premtojnë zbutjen e thatësisë ekstreme me përjashtim të disa zonave në Mal të Zi dhe Kosovë ku mund të ketë përqendrim më të madh të rrebesheve të shiut.
Për zbutjen eventuale të thatësisë ekstreme do të duhej të presim edhe shumë ditë.
Përndryshe, vazhdon moti kryesisht me diell dhe i nxehtë (me përjashtim të ditës së Enjte për disa rajone), ndërsa temperaturat do të rriten në fundjavë, por jo mbi 35 gradë Celsius në Kosovë, ngase fronti i së enjtes mund të ndikojë që ato të mos rriten siç kishim paralajmëruar në rubrikën e “motit javor.
Pra, kemi ndryshime të vogla në parashikim. Të Enjten presim destabilizim të atmosferës orëve të pasdites ose mbrëmjes, vende-vende me rrebeshe intensive shiu me vetëtima dhe bubullimë (Mal i Zi dhe disa zona në Kosovë), kurse ditëve tjera nxehtë, por jo ekstremisht nxehtë (Kosovë), pra disa gradë më freskët se që kishim paralajmëruar më herët. Në Shqipëri dhe Maqedoninë Veriore më nxehtë dhe temperaturat maksimale pak mbi 35 gradë Celsius ose deri afër 40.
Sidoqoftë, i nxehti veror vazhdon edhe javën tjetër dhe atëherë mund të presim temperaturat e lajmëruara deri afër 40 gradë Celsius edhe në Kosovë./MeteoBallkan
