Nën ndikimin e vazhdueshëm dhe konstant të masave ajrore të thata anticiklonike po vazhdon mot mjaft monoton dhe i ngrohtë për këtë periudhë kohore, me përjashtim të dy tri ditëve të kaluara ku pati reshje lokale nga kalimi i një cikloni afër territoreve tona.
Përndryshe tani kemi përsëri masën stabile ajrore, dominante, anticiklonike që do të kushtëzojë mot të thatë dhe me diell ditëve të ardhshme. Mëngjeset do të jenë të ftohta dhe lokalisht me acar, por rritja e temperaturave ditore do të ndjehet sidomos të Premten.
Të shtunën për ditën e Pavarësisë së Republikës së Kosovës na pret mot me diell dhe i ngrohtë për këtë periudhë kohore. Mund të themi se e shtuna me shumë probabilitet mund të jetë një ditë pothuajse pranverore.
Zhgënjimi më i madh për këtë muaj vjen për entuziastët e reshjeve të borës kur tani e dimë që gjasat për borë janë zvogëluar krejtësisht edhe për dekadën e dytë të Shkurtit dhe po ashtu edhe për dekadën e tretë nuk janë edhe aq bindëse , megjithatë mund të ndodh në dhjetëditëshin e fundit të Shkurtit.
Pra, vazhdon monotonia meteorologjike e cila fatmirësisht iu konvenon shumë njerëzve sidomos atyre me probleme më të mëdha ekonomike dhe kjo është shumë pozitive.
Sipas ecurive aktuale sinoptike, përkeqësime të lehta të motit do të kemi shpesh-herë, por pa ndonjë përkeqësim që vlene të theksohet deri afër fundit të Shkurtit./MeteoBallkan
