Vranësirat e sistemit frontal shihen në imazhet satelitore që nga Antantiku afër Spanjës dhe Portugalisë e deri në perëndim të Rusisë.
Në këto çaste kemi depërtimin e fronteve të fuqishme që nga Franca, Zvicra, jugu i Gjermanisë, veriu i Italisë, pjesë të Austrisë, Çekisë, jugu i Polonisë, jugu i Bjellorusisë, veriu i Ukrainës dhe pjesë në perëndim të Rusisë, pra kemi të bëjmë me një front me përmasa të gjera në kuadër të ciklonit masiv në Skandinavi dhe Rusi.
Me ardhjen e frontit të ftohtë në Alpe, diku në veri të Italisë pritet të krijohet një ciklon i cili së bashku me frontin e ftohtë do të na sjellë reshje atmosferike të Premten vonë ose të Shtunën herët. Reshjet pritet të fillojnë si shi, pastaj pritet të shndërrohen në borë në shumë pjesë të Kosovës, disa pjesë të Shqipërisë dhe Maqedonisë së Veriut. Pas frontit të ftohtë do të depërtojnë temperaturat polare, por e gjitha do të jetë kalimtare. Fronti do të jetë kalimtar, reshjet e borës kalimtare megjithëse do të krijojnë shtresa, por edhe temperaturat e ulëta do të jenë kalimtare, sepse pas dy ditëve do të ketë ndryshim në rrymimet ajrore dhe rritje të temperaturave.
Përpara frontit të ftohtë ka rritje të temperaturave, ndërsa pas frontit ulje të ndjeshme të tyre.
Reshjet e borës pritet të fillojnë orëve të vonshme të së Premtes, eventualisht orëve të hershme të së Shtunës.
Ky front do të sjellë reshje bore aty ku tradicionalisht bjen borë, pra shumë pjesëve të Kosovës, veriut dhe lindjes së Shqipërisë lokalisht si dhe disa pjesë të Maqedonisë së Veriut. Borë do të ketë edhe në disa ultësira.
Do të jetë kjo një “goditje” e fortë dimërore, por krejtësisht “jetëshkurtër” dhe më e rëndësishmja ajri do të pastrohet dhe mjegulla do të largohet të paktën përkohësisht.
Për detajet më të reja në postimet tona gjatë ditës së Premte./MeteoBallkan
