Nën ndikimin e plotë të masave të thata dhe stabile anticiklonike po vazhdon nxehtësia verore e cila po intensifikohet këto ditë për shkak të ardhjes së një sasie të re të ajrit të nxehtë me origjinë nga Afrika veriore.
Temperaturat po shënojnë rritje të vazhdueshme dhe pritet të kulmojnë diten e Enjte deri në 37 apo 38 gradë Celsius.
Njëkohësisht të Premten do të kemi arritjen e një fronti të dobët, të ftohtë ajror i cili sadopak do të sjellë vranësira dhe rrebeshe të izoluara shiu me vetëtima dhe bubullimë. Para ardhjes së këtyre masave pjesërisht jo-stabile do të jetë shumë nxehtë dhe shumë zagushi.
Zhvillime të izoluara do të ketë edhe sonte dhe të Enjten pasdite, por këto do të jenë shumë të pakta dhe të papërfillshme vetëm në disa zona kodrinore-malore. Zhvillime të forta priten të Premten orëve të pasdite ku vende-vende përpos vranësirave do të ketë edhe rrebeshe shiu me vetëtima dhe bubullimë.
Reshjet do të jenë të karakterit lokal dhe nuk priten reshje në të gjitha viset. Në disa zona mund të ketë stuhi të forta me breshër, kurse shumë zona prapë do të mbesin pa reshje fare.
Në përgjithësi thatësia ekstreme pritet të vazhdojë me zbutje të përkohshme vetëm në disa rajone ku rrebeshet do të zhvillohen.
Pas rrebesheve lokale do të kemi ulje të temperaturave dhe fundjava dotë jetë më e këndshme në aspektin termik, pra do të jetë paksa më e freskët dhe kryesisht me diell. Të shtunën në mëngjes herët mund të ketë ende rrebeshe lokale shiu me vetëtima dhe bubullimë./MeteoBallkan
