Në tërë rajonin tonë sot po mbanë mot me intervale kohore me diell dhe vranësira. Më shumë rreze diellore ka në jug dhe perëndim të Shqipërisë. Vranësirat i kemi “dhuratë” nga cikloni i cili me qendrën e tij gjendet në Rumani dhe Ukrainë dhe ky ciklon ka ende ndikim në rajonin tonë por pa reshje atmosferike.
Nga nesër në Britaninë e Madhe pritet të krijohet një ciklon mjaft i fuqishëm i cili gradualisht do të fillojë të ndikojë edhe në kushtet sinoptike mbi rajonin tonë. Pikërisht ky ciklon do të jetë “përgjegjës” për ngritjen e temperaturave tek ne sepse do të shkaktojë rrymime ajrore nga jugu dhe Afrika Veriore në drejtim të rajonit tonë.
Herë pas here do të ketë edhe ndonjë rigë ose rrebesh shiu sidomos në Shqipëri, ku nesër priten rrebeshe lokale shiu me vetëtima dhe bubullimë, fillimisht në jug dhe perëndim dhe pastaj në disa vise tjera deri në veri, por këto rrebeshe do të jenë kalimtare. Në viset tjera të rajonit tonë do ti kemi tri ditë kryesisht të thata dhe të nxehta, me erëra jugore me përjashtim të veriut dhe veriperëndimit të Shqipërisë ku nga Mali i Zi mund të depërtojnë rrebeshe të fuqishme shiu me vetëtima dhe bubullimë sidomos të dielën.
Nga e hëna në tërë rajonin do të kemi rrebeshe lokale shiu me vetëtima dhe bubullimë. Vende-vende priten rrebeshe intensive të cilat mund të shkaktojnë probleme./Meteoballkan
