Një 29-vjeçar pësoi lëndime vdekjeprurëse pasi u rrëzua nga qindra metra lartësi ndërsa ishte në një resort skish në jug të Bullgarisë.
Turisti thuhet të ketë qenë pjesë e një grupi që po fotografonte peizazhin përreth, kur humbi ekuilibrin dhe ra nga një lartësi prej rreth 600 metrash në vendpushimin në Bansko, të martën pasdite.
Ai u gjet nga një ekip i shërbimit të shpëtimit malor dhe u dërgua në një spital në qytetin e afërt të Razlogut në një gjendje të rëndë me lëndime të shumta, thanë shërbimet e urgjencës.
Viktima – i cili ishte një shtetas irlandez – fillimisht do të merrej me ambulancën e vetme ajrore të vendit, por ‘për shkak të një mosfunksionimi teknik’ udhëtimi u ndërpre.
Ai u transportua me makinë dëbore përpara se të transferohej në një autombulancë, njoftoi agjencia bullgare e lajmeve Novinite.
Autoritetet tani po hetojnë pse helikopteri pësoi një defekt teknik, transmeton Telegrafi.
“Turisti i lënduar është dërguar në spital në gjendje kritike, ku janë marrë masa për shpëtimin e jetës dhe është bërë vlerësimi i plotë i lëndimeve të tij”, tha mjeku Valentin Belçev.
Megjithatë ai mbeti në gjendje kritike dhe vdiq të mërkurën.
“Përkundër të gjitha përpjekjeve të ekipit tonë mjekësor, ai përfundimisht ai nuk i mbijetoi lëndimeve të rënda”, tha ndër tjera mjeku bullgar.
Bankso shtrihet në rrëzë të maleve Pirin, ku maja më e lartë, Vihren, ngrihet në një lartësi prej 2,914 metrash.
Një zëdhënës i Departamentit të Punëve të Jashtme ka thënë se është “në dijeni të rastit dhe është duke ofruar ndihmë konsullore”.
Tragjedia ndodhi në të njëjtën ditë që një britanik u humbi jetën pasi u përfshi nga një ortek ‘shumë i madh’ në Alpet Franceze.
