Fushat e fuqishme ajrore ciklonike të cilat nga Oqeani Atlantik kanë depërtuar në Evropë duke shkaktuar përkeqësim dramatik të motit do të vazhdojnë të ndikojnë edhe gjatë kësaj jave si në Evropë, po ashtu edhe në rajonin tonë, por reshjet atmosferike tek ne do të jenë shumë të pakta krahasuar me disa pjesë të Evropës.
Reshje pak më intensive gjatë kësaj jave do të ketë në disa vise të Shqipërisë, Dukagjinit, Malit të Zi dhe Maqedonisë së Veriut, ndërsa për disa rajone reshjet do të lënë ende shumë për të dëshiruar.
Sot (e Hënë) siç po e shohim në tërë rajonin po mbanë mot tërësisht i vranët dhe me reshje shiu të intensitetit të ndryshëm. Pasdite nga jugu i Shqipërisë do të pasojnë kthjellime të pjesshme.
Në mbrëmje vonë dhe gjatë natës reshjet do të pushojnë, ndërsa nesër (E Martë) na pret një ditë më e qetë, me alternime mes vranësirash dhe intervaleve kohore diellore. Nëpër lugina do të ketë mjegull i cila pritet të largohet. Në mbrëmje nga jugu i Shqipërisë do të fillojnë reshje të reja shiu dhe rrebeshe me vetëtima dhe bubullimë të cilat do të përhapen gradualisht në tërë rajonin. Në malet e larta reshje bore. Këto reshje na vijnë nga cikloni i ri nga Mesdheu.
Gjatë ditës së mërkurë na pret mot me reshje shiu, vende-vende priten reshje të dendura shiu. Në viset malore priten reshje bore.
Edhe ditëve të ardhshme do të jemi nën ndikimin e fushave ajrore me presion të ulët atmosferik (ciklone) të cilat herë pas here do të ne sjellin reshje shiu. Në përgjithësi reshjet e shiut do të përfshijnë tërë rajonin por diku më shumë e diku më pak. Më së shumti reshje priten në disa vise të Shqipërisë (jug-veri), Malit të Zi dhe Maqedonisë së Veriut dhe si zakonisht reshjet më të pakta priten në Rrafshin e Kosovës.
Për fundjavë na pret mot pak më i ftohtë për shkak të uljes së temperaturave si pasojë e fillimit të erërave veriore dhe përpos reshje të herëpashershme të shiut priten edhe reshje bore në viset kodrinore-malore. Reshje ose fjolla dëbore mund të ketë edhe në disa qytete ose qyteza të Republikës së Kosovës.
Këto reshje do të jenë jashtëzakonisht të mirëseardhura sidomos për rajonet e goditura nga thatësia e madhe, por, normalisht për disa rajone reshjet do të jenë të pakta sepse nevojiten sasi të mëdha reshjesh për largimin e thatësisë e cila po mbizotëron për një kohë të gjatë, megjithatë ndryshime në parashikim mund të ketë sepse ky është një parashikim afatgjatë dhe të shpresojmë që modelet numerike globale për parashikim të motit të rrisin sasinë e të reshurave në përditësimet e tyre të ardhshme./Meteoballkan
