Kjo javë do të karakterizohet me mot mjaft të ndryshueshëm për shkak të ndikimit të masave të ndryshme ajrore ciklonike dhe anticiklonike mbi rajonin tonë.
Fillimi i javës siç po e shohim tani kemi shtim të vranësirave për shkak të afrimit të një cikloni të fuqishëm nga Italia dhe Deti Adriatik. Gjatë pasdites dhe mbrëmjes do të kemi reshje të dendura shiu në tërë rajonin, ku vende-vende mund të kemi shtrëngata të fuqishme me shkarkesa të fuqishme atmosferike dhe breshër. Përkeqësimi kryesor i motit do të jetë pra sonte pasdite vonë, në mbrëmje dha gjatë natës. Gjatë ditës së nesërme do të kemi kthjellim gradual, intervale kohore me diell, por edhe vranësira me riga lokale shiu. Temperaturat do të shënojnë ulje nesër dhe pasnesër (të mërkurën). Reshjet do të jenë sporadike të enjten do të kemi masa të reja ajrore ciklonike nga Mesdheu, por njëkohësisht edhe ngritje të temperaturave.. Priten përsëri reshje shiu, në Shqipëri herë pas here priten reshje intensive lokale dhe rrebeshe lokalisht të fuqishme shiu me vetëtima dhe bubullimë. Edhe në viset tjera priten reshje të herëpashershme shiu të enjten dhe të premten, por do të jetë relativisht nxehtë për shkak të rrymimeve ajrore kryesisht nga jugu dhe perëndimi
Për fundjavë na presin ulje të lehta të temperaturave. Do të kemi alternime mes vranësirash, intervaleve kohore me diell dhe rigave lokale kryesisht të dobëta të shiut. Erërat do të fillojnë të fryjnë nga perëndimi, veriu dhe veriperëndimi.
Ishte ky një përshkrim i shkurtër për motin gjatë kësaj jave bazuar në ecuritë më të fundit sinoptike. Nëse eventualisht kemi ndonjë ndryshim do tu njoftojmë në postimet tona të përditshme./Meteoballkan
