Gjatë kësaj jave do të kemi dobësimin e masave ajrore anticiklonike të cilat na sollën mot të thatë dhe stabil gjatë tërë pjesës së parë të muajit Nëntor dhe kjo do të fillojë nga nesër me depërtimin e një fronti i cili megjithatë do të jetë mjaft i dobët në rajonin tonë duke sjellë reshje lokale të dobëta shiu, ndërsa në viset malore reshje të dobëta bore. Ky front ishte paraparë më i fuqishëm, por çdo ditë e më shumë në simulimet më të reja të modeleve fronti shihet si i dobët dhe me pak reshje atmosferike.
Sidoqoftë sot dhe nesër na pret mot me intervale kohore diellore, ndërsa nesër do të ketë shtim të vranësirave të cilat në mbrëmje vonë do të na sjellin edhe reshje lokale shiu kryesisht të intensitetit të dobët deri mesatar. Pas kalimit të frontit do të kemi ulje të lehta të temperaturave dhe rikthimin e masës së fuqishme ajrore anticiklonike.
Pra, nga e mërkura na pret mot me vranësira, intervale kohore diellore, me mëngjese të ftohta, me mundësi për mjegull dhe ngrica të dobëta. Temperaturat ditore do të sillën nga 8 deri në 14 gradë Celsius.
Për fundjavë gjendja është shumë interesante sepse afër Italisë do të kemi krijimin e një cikloni të fuqishëm dhe dilema e madhe është nëse ky ciklon do të shtrihet edhe në territoret tona. Gjatë fundjavës do të kemi depërtimin e parë pak më serioz të masave ajrore të ftohta polare mbi rajonin tonë me ulje të temperaturave dhe erëra të ftohta veriore dhe verilindore, por se a do përcillet ky i ftohtë me reshje dëbore apo jo ende është një enigmë e madhe. Nëse shohim modelin amerikan GFS gjatë fundjavës na pret një idilë e vërtetë dimërore, por nëse shohim modelin evropian ECMWF na presin vetëm disa fjolla sporadike bore. Për këtë arsye sot nuk mund të japin parashikim shumë të qartë për këtë fundjavë, por ne do të jemi duke e përcjellur gjendjen sinoptike dhe do ju lajmërojmë me kohë.
Një është e sigurte se për fundjavë do të kemi depërtimin e parë të masave ajrore të ftohta me origjinë polare dhe ne do të jemi duke i parë evoluimin e gjendjes sinoptike dhe do ju lajmërojmë në postimet tona të përditshme./Meteoballkan
