Gjatë kësaj jave në viset tona do të mbizotërojë mot mjaft i ftohtë dhe me temperatura polare. Bërthama e mases së fuqishme ajrore polare nga veriu do të dyndet në lindje të Evropes dhe do të drejtohet në Turqi, por një masë e konsiderueshme e ajrit të ftohtë do të përfshijë edhe territoret tona, prandaj pritet që të jetë mjaft ftohtë, herë – herë me acar të fortë, por o shumë ekstreme për këtë periudhë kohore. Normalisht, temperaturat do të jenë dukshëm nën vlerat mesatare.
Për shkak të mungesës së ndonjë ciklogjeneze intensive dhe ndikimit shumë të fuqishëm anticiklonik reshjet atmosferike nuk do të jenë të mëdha, megjithatë herë pas here priten reshje kryesisht bore, të karakterit lokal.
Kjo masë mjaft e ftohtë ajrore do të jetë prezente pothuajse gjatë tërë javës, ndërsa në fundjavë do të fillojë të largohet më në lindje duke zbutur acarin në territoret tona. Megjithatë, temperaturat ditore do të dalin në “plus” me ndonjë përjashtim ku ndonjë ditë mund të jenë në “minus” gjatë tërë ditës në shumë rajone, por jo në të gjitha.
Fillimi i javës do të jetë i ftohtë dhe ajri i ftohtë do të fuqizohet në mesjavë edhe më shumë, por me afrimin e fundjavës acari do të fillojë të zbutet gradualisht dhe temperaturat ditore po ashtu do të fillojnë të rriten gradualisht. Reshje lokale bore priten gjatë ditëve të para të javes. Me kalimin e ditëve nga e Enjta nuk priten më reshje për shkak të masave të fuqishme ajrore anticiklonike.
Do të fryjnë erëra mjaft të ftohta nga veriu e verilindja. Temperaturat minimale ndonjë natë mund të ulen deri në -10 gradë Celsius, ndërsa ato ditore nga 0 deri në 7 apo 8 gradë Celsius.
Ishte ky parashikimi i motit me disa fjali të shkurtra për këtë javë. Ndryshime të vogla mund të ketë si në aspektin e temperaturave, po ashtu potencialisht edhe sa iu përket reshjeve atmosferike. Për çdo ndryshim do të njoftoheni në postimet tona të përditshme./MeteoBallkan
