Në territorin e Francës kemi depërtimin e masave mjaft jo-stabile atmosferike nga Oqeani Atlantik ku ka zhvillime shumë të fuqishme konvektive dhe shtrëngata intensive të karakterit lokal.
Këto stuhi të fuqishme do të zhvendosen ose ripërtërihen pikërisht në territorin e Gjermanisë duke shkaktuar stuhi mjaft të fuqishme kalimtare në shumë pjesë të këtij shteti në të cilin është duke u mbajtur Kampionati Evropian i futbollit.
Rrymat ajrore mjaft jo-stabile janë të përqendruara që nga Portugalia e Spanja, Franca, Gjermania e deri në Skandinavi e Rusi një “patern” që ndodhë shpeshherë gjatë verës por që nuk përfshinë aq shpesh Spanjën dhe Portugalinë. Në anën tjetër rryma ajrore ekstremisht të nxehta së bashku me stabilitetin anticiklonik janë të përqendruara në viset tona dhe në përgjithësi në juglindje të Kontinentit Evropian.
Një “Patern” i tillë atmosferik do të vazhdojë edhe ditëve të ardhshme me kupolën e nxehtësisë afrikane që do të vijë direkt në drejtim të viseve tona, ndërsa zhvillimet konvektive do të jenë të rralla dhe të izoluara kryesisht në disa vise kodrinore-malore. Njëkohësisht stuhi të fuqishme pothuajse çdo ditë vazhdojnë që nga jugperëndimi e perëndimi i Evropës e deri në veri ose Skandinavi e Rusi.
Një mase mjaft jo-stabile ajrore ka mundësi që të depërtojë në viset tona të dielën apo të hënën, por kjo mbetet të shihet./MeteoBallkan
