Kjo, sipas njoftimit, ka ndodhur për faktin se mungesat e furnizimit nga KESCO janë plotësuar nga KEK me hyrjen në operim të bllokut B2, duke kontribuar në stabilitetin e furnizimit dhe ruajtjen e integritetit të sistemit.
“KOSTT njofton se gjendja në sistemin elektroenergjetik është stabilizuar pas masave të koordinuara për balancimin e ngarkesës dhe përmirësimin e furnizimit me energji elektrike”- thuhet në njoftim.
KOSTT u bën thirrje të gjitha palëve në treg të respektojnë rregulloret dhe të sillen me përgjegjësi, për të siguruar operim të qëndrueshëm dhe të sigurt të rrjetit.
Mëngjesin e së martës, KOSTT ka bërë të ditur se po përballej me vështirësi të jashtëzakonshme në balancimin e sistemit në kohë reale, sipas tyre, për shkak të devijimeve të mëdha ndërmjet energjisë së nominuar dhe kërkesës reale.
Sipas KOSTT-it, sot, më 20.01.2025, KESCO ka nominuar rreth 26.17% më pak energji sesa kërkesa reale, duke e çuar Zonën e Kontrollit KOSTT në jobalanca mesatare prej rreth 211 MW orë, ndërsa në disa orë këto jobalanca tejkalojnë 260 MW orë.
