Atmosfera anticiklonike për një kohë mjaft të gjatë kohore në viset tona po favorizon mot krejtësisht stabil dhe të qetë, ndërsa temperaturat ditore vazhdojnë të jenë të larta për këtë periudhë kohore.
Një ndryshim i vogël gjatë fundjavës kemi krijimin e një bërthame të ajrit të ftohtë që shkëputet nga Siberia ruse dhe zhvendoset në Detin e Zi, jug të Ukrainës, Rumani dhe Bullgari. Kjo bërthamë e vogël e ajrit të ftohtë polar nuk ka fuqi të madhe për të shkaktuar ndonjë destabilizim të fortë të atmosferës, por do të shkaktojë ulje të temperaturave dhe erëra të thata dhe të ftohta nga verilindja.
Ndikimi i saj në Kosovë pritet të ndjehet të dielën me erëra paksa më të ftohta verilindore dhe vranësira lokale. Mund të ndodhë ndonjë reshje e dobët bore në disa vise kodrinore-malore, por në përgjithësi në mungesë të ndonjë ciklogjeneze kjo masë ajrore do të jetë pothuajse tërësisht e thatë.
Ndikimi i ardhjes së kësaj mase të ftohtë ajrore nuk do të jetë i madh. Temperaturat do to pësojnë ulje si maksimalet po ashtu edhe ato minimale me erëra të ftohta nga verilindja dhe aty-këtu ndonjë reshje e dobët kalimtare. Në Shqipëri sidomos në viset mesdhetare ndikimi do të jetë shumë i vogël, pothuajse inekzistent.
Megjithatë në aspektin meteorologjik kjo masë e ftohtë ajrore shënon fillimin e një dinamizimi gradual të atmosferës dhe kjo shumë interesante për stafin meteorologjik.
Jashtëzakonisht interesante do të jetë situata sinoptike në fillim të javës së re. Diku në Detin Baltik do të kemi depërtimin e një cikloni dhe nga Skandinavia mund të kemi depërtimin e një mase më të fuqishme të ftohtë ajrore në Mesdhe duke “provokuar” krijimin e ndonjë ciklogjeneze të fuqishme në Mesdhe.
Ende shumë herët të flitet për detaje të mëtutjeshme, por java e ardhshme mund të jetë dukshëm më dinamike dhe me mundësi për reshje atmosferike dhe kjo do të varet nga situata sinoptike dhe sasia e ajrit të ftohtë që vjen nga nga veriu i ftohtë në Evropën dhe Mesdheun e nxehtë.
Pra, deri të dielën pa asnjë ndryshim. Të dielën pak më ftohtë dhe shkurtimisht reshje të dobëta vetëm në disa zona. Java tjetër mbetet interesante për tu përcjellur./MeteoBallkan
