Java e fundit e vitit 2020 do të karakterizohet me mot mjaft të paqëndrueshëm por të nxehtë për këtë periudhë kohore. Herë pas here priten reshje shiu, erëra vende-vende të fuqishme jugore, ndërsa në malet e larta priten reshje bore. Reshje më intensive shiu në Kosovë priten në rajonin e Dukagjinit, veçanërisht në Pejë me rrethinë ku mund të ketë edhe vërshime afatshkurtra lokale.
Edhe në Shqipëri, Maqedoninë Veriore dhe Mal të Zi gjatë kësaj jave pritet mot mjaft i paqëndrueshëm, me reshje herë pas here dhe vende-vende intensive shiu, erëra të fuqishme jugore dhe rrebeshe intensive shiu me vetëtima dhe bubullimë në bregdetin shqiptar. Në veri të Shqipërisë dhe jug-jugperëndim priten reshjet më të mëdha, ndërsa reshje priten edhe në viset tjera por të intensitetit më të ulët.
Kjo nuk do të thotë se do të ketë erëra dhe reshje pa ndërprerje, por me intervale të caktuara kohore.
Motin mjaft të paqëndrueshëm po e shkakton cikloni masiv dhe i fuqishëm i cili përmes Atlantikut po depërton në Mesdhe duke trazuar Mesdheun dhe tërë Evropën.
Në aspektin termik në rajonin tonë gjatë kësaj jave temperaturat do të jenë mbi vlera normale për shkak të rrymimeve të vazhdueshme ajrore nga Mesdheu ose jugu.
Pra, gjatë tërë javës priten alternime mes vranësirave, intervaleve kohore me diell, rigave dhe rrebeshe të shiut si dhe erërave herë pas here të fuqishme nga jugu. Në viset e larta malore priten reshje të herëpashershme bore./Meteoballkan
