Kjo javë do të fillojë me mot të nxehtë, stabil dhe me diell. Temperaturat do të jenë mjaft të larta për këtë periudhë kohore. Kjo vjen si pasojë e mbizotërimit të anticiklonit të fuqishëm me qendër në Evropën Qendrore dhe Lindore.
Pra, sot në Kosovë, Shqipëri dhe Maqedoni do të mbajë mot me diell dhe mjaft i nxehtë. Mot i ngjashëm do të mbajë edhe të Martën dhe të Mërkurën dhe sipas të gjitha gjasave edhe të Enjten dhe të Premtën.
Përderisa në Britaninë e Madhe sot do të kemi ardhjen e Ex Uraganit Helene ku erërat pritet të arrijnë deri në 120 km në orë tek ne anticikloni do të na garantojë mot stabil dhe me diell.
Sipas ecurive aktuale sinoptike në fundjavën e ardhshme pritet që në rajonin tonë të depërtojë një front i fuqishëm i ftohtë ajror i cili do të na sjell reshje të dendura por kalimtare shiu si dhe zbritje rapide të temperaturave kurse javën tjetër pritet që mbi rajonin tonë të krijohet një ciklon i fuqishëm i cili do të na sjell reshje të dendura dhe shumë të mirëpritura shiu.
Sidoqoftë në fund të theksojmë se parashikimet afatgjata nuk janë krejtësisht të besueshme dhe këtë informacion duhet marë me rezerva, por nëse ndodh ndonjë ndryshim në parashikim apo në ecuritë sinoptike do të njoftoheni me kohë.
Modelet kompjuterike këto ditë variojnë shumë në parashikimin e motit sepse Oqeani Atlantik është jashtëzakonisht aktiv si pasojë e Uraganeve të fuqishme që gjenden atje dhe për këtë arsye mjafton që njëri Uragan të ndryshojë trajktorën për disa kilometra dhe kjo do të sillte edhe ndryshimin e gjendjes sinoptike në Evropë dhe tek ne.
Ne do të jemi duke e përcjellur gjendjen dhe do tju inforomojmë me kohë kështu që na përcillni në parashikimet tona afatshkurtëra të cilat janë shumë kredibile.
Meteoballkan.
