Java që po hymë do të karakterizohet me kushte mjaft të ndryshueshme sinoptike në rajonin tonë veçanërisht fillimi i javës.
Kjo vjen si pasojë e depërtimit të një mase mjaft jo-stabile ajrore me origjinë polare.
Fillimi i javës do të jetë mjaft i nxehtë, por me fuqizim të erërave jugore dhe jugperëndimore të cilat në disa rajone mund të jenë problematike. Dita e dytë e javës do të shënojë ardhjen e masës së ftohtë ajrore nga veriu e cila do të shkaktojë destabilizim të motit dhe reshje atmosferike. Priten reshje intensive shiu dhe bore, por këto reshje nuk pritet të zgjasin shumë sepse menjëherë nga e mërkura mbi rajonin tonë do të shtrihet masa të thata ajrore anticiklonike me qendër afër Britanisë së Madhe.
Edhe pse gjendemi në mes të muajit Prill pritet që të kemi reshje dëbore në shumë rajone të Republikës së Kosovës, verilindje të Shqipërisë, veri të Malit të Zi si dhe viset malore të lindjes, juglindjes së Shqipërisë dhe Maqedonisë së Veriut. E kemi fjalën për të martën në mbrëmje dhe mëngjesin e së mërkurës.
Natën mes së mërkurës dhe së enjtës mund të ketë ngrica nëse do të ketë kthjellim të plotë të motit, por këtë nuk mund ta dimë me saktësi të madhe.
Nga dita enjte pritet të kemi stabilizim të motit dhe ngritje të temperaturave. Gjithashtu pritet që edhe erërat të qetësohen.
Për fundjavë na pret mot i ngrohtë, me alternime të vranësirave dhe intervaleve kohore me diell. Vende-vende mund të ketë edhe rrebeshe të izoluara shiu me mundësi edhe për vetëtima dhe bubullimë./Meteoballkan
