Atmosfera reagoi mjaft bujshëm të Dielën me depërtimin e një fronti të dobët të ftohtë ajror me kontaktin në ajrin shumë “të sertë” afrikan. Mbi Kosovë gjatë ditës së djeshme u krijuan disa sisteme stuhish shumë të fuqishme që prodhuan rrebeshe shumë intensive dhe breshër gjigand dhe u shkaktuan edhe dëme materiale.
Sistemi më i fuqishëm u krijua dhe u fuqizua në Fushën e Kosovës i cili kapi edhe Prishtinën.
Temperaturat shënuan ulje, por mbeti zagushia, ndërsa edhe gjatë javës së re priten temperatura verore, por jo sikur ditët që lamë pas.
Cikloni i shtresave të larta atmosferike i cili është stacionuar në Itali ose përtej brigjeve të Italisë është më së shumti përgjegjës për gjendjen e krijuar, ndërsa frontet e ftohta nga Evropa qendrore do të depërtojnë shumë lehtë gjatë kësaj jave duke destabilizuar atmosferën pothuajse çdo ditë, ngase nuk do të ketë ndonjë bllokadë anticiklonike që do të mbajë atmosferën stabile.
Si pasojë këtyre masave të paqëndrueshme dhe ajrit të nxehtë që vjen nga Afrika veriore dhe dita e gjatë verore stuhitë të fuqishme të së dieles mund të përsëriten në disa rajone të Kosovës dhe Maqedonisë së Veriut. Është jashtëzakonisht e vështirë të përcaktohet rajoni i saktë ku do të ndodhë një stuhi e madhe verore.
Pra, nga sot (e hënë) atmosfera do të jetë gjithnjë e më jo-stabile, por nuk do të mungojnë intervalet e gjata kohore me diell. Pas paraditeve të nxehta, çdo pasdite do të ketë gjasa për zhvillime mjaft të fuqishme konvektive që do të krijohen kushte për stuhi mjaft të fuqishme lokale. Të gjitha këto zhvillime do të jenë të karakterit lokal. përderisa një rajon përfshihet nga ndonjë shtrëngatë mjaft të fuqishme, rajone tjera jo shumë larg kapen nga ndonjë rigë shiu ose pa reshje fare.
Pothuajse çdo ditë deri të shtunën do të ketë gjasa për zhvillime të rrebesheve të fuqishme lokale të shiut me vetëtima, bubullimë dhe mundës për breshër. Temperaturat do të jenë të larta në kohën e intervaleve kohore me diell, për të pësuar ulje në kohën e vranësirave e rrebesheve të shiut, ndërkohë që vazhdon zagushia e lartë për shkak të lagështisë së lartë relative të ajrit.
Stabilizim të motit presim ditën e shtunë. E Diela pritet të jetë ditë shumë e nxehtë verore dhe pa rrebeshe shiu. Temperaturat përsëri mund të rriten deri në 35 gradë Celsius edhe në Kosovë.
Temperaturat gjatë javës (ditëve të punës) do të shënojnë rritje afërisht deri në 32 gradë Celsius në Kosovë dhe deri në 35 gradë Celsius në Shqipëri ndërsa ato nuk do të jenë konstante apo stabile, ngase do të varen nga zhvillimet ditore dhe do të pësojnë luhatje të shpeshta. Pak më freskët sidomos në mesjavë ose të Enjten dhe të Premten Dita më e nxehtë në Kosovë pritet të jetë sot (e hënë) dhe dita e fundit e vikendit apo e Diela kur temperatura mund të shkojë deri në 36 gradë Celsius.
Më së shumti rrebeshe shiu gjatë kësaj jave priten në viset kontinentale sidomos në Kosovë dhe Maqedoninë Veriore, pastaj në veri të Malit të Zi dhe sidomos në Luginë të Preshevës, por edhe në viset kontinentale të Shqipërisë, megjithatë edhe në bregdetin shqiptar nuk do të mungojnë stuhitë afatshkurtra lokale, por kjo nuk do të ndikojë shumë në prishjen e pushimeve në bregdet. Normalisht mund të ndodhë ndonjë ditë gjatë javës të ketë më shumë vranësira dhe ndonjë reshje, por jo për kohë shumë të gjatë.
Për shkak të atmosferës jashtëzakonisht dinamike që pritet këtë javë ndryshime në parashikim mund të ketë. Për çdo ndryshim eventual do të njoftoheni në postimet tona të përditshme./MeteoBallkan
