Në fillim të potencojmë se ndryshimi i motit që po vjen është plotësisht normal sepse kemi depërtimin e një mase të fuqishme ajrore nga Arktiku në Evropë e Mesdheun e ngrohtë dhe kjo shkakton stuhi, reshje dhe ndryshime të shpeshta të temperaturave. Pra, nuk kemi të bëjmë me ndonjë fenomen jo-normal, megjithatë mund të ketë procese të bujshme atmosferike që mund të shkaktojnë mjaft probleme por të cilat janë normale.
Pas një kohe të gjatë me dominim anticiklonik dhe me mot kryesisht të qetë, radhën e kanë reshjet nganjëherë intensive të shiut dhe borës, ndryshimet të shpeshta të temperaturave dhe nganjëherë edhe erërat mjaft të fuqishme. Mund të ketë edhe përmbytje të shpejta lokale.
Ndryshimi i motit do të fillojë që nga e marta me reshje lokale shiu, me të theksuara në veriperëndim të Shqipërisë. Reshje lokale mund të ketë edhe në Kosovë. Reshje mjaft intensive priten të Mërkurën sidomos orëve të vonshme. Me ardhjen e “lagështirës” nga Mesdheu, njëkohësisht kemi frontin e ftohtë nga veriu. Në veri dhe verilindje të Kosovë do të fillojnë reshje bore të cilat mund të jenë të dendura në disa intervale dhe të krijojnë shtresa bore. Reshje të dendura priten sidomos në viset kodrinore-malore të tërë rajonit. Në Shqipëri dhe Maqedoninë Veriore kryesisht reshje shiu, ndërsa borë vetëm në zonat malore. Fillimisht të mërkurën do të jetë ngrohtë sepse do të jemi nën ndikimin e masave të ngrohta ajrore që vijnë si rezultat i rrymimeve të fuqishme ajrore nga jugu. Me depërtimin e frontit të ftohtë nga veriu gjatë orëve të vonshme temperaturat pësojnë ulje rapide në ato zona ku vjen fronti i ftohtë duke filluar nga veriu i Kosovës dhe veriu i Malit të Zi. Reshje bore priten lokalisht edhe në zona tjera të Kosovës mëngjesin e së Enjtes.
Të Enjten kemi reshje bore e shiu sidomos orëve të hershme dhe eventualisht paradite, ndërsa sistemi i fuqishëm frontal kalon pason stabilizimi i shkurtër i motit. Erërat menjëherë do të fillojnë përsëri të fryjnë nga jugu që është shenjë afrimit të sistemit të ri mjaft të fuqishëm frontal i cili depërton të Premten me reshje të reja shiu e pastaj edhe me reshje bore orëve të vonshme dhe mëngjesin e së shtunës. Para ardhjes së sistemit priten rritje e temperaturave, por edhe reshje të dendura shiu. Me depërtimin e frontit priten erëra të fuqishme dhe shiu do të shndërrohet në borë prapë ne vendet ku tradicionalisht bjen borë. Sistemi i fundjavës mund të depërtojë edhe në Shqipëri dhe Maqedoninë Veriore me reshje bore (pas shiut) në lindje-juglindje të Shqipërisë dhe perëndim të Maqedonisë së Veriut, por reshjet më të dendura të borës priten në Kosovë e sidomos në veri të Malit të Zi.
Fundjava vjen me ulje të ndjeshme të temperaturave pas frontit të fuqishëm të së premtes mbrëma dhe do të kemi acar të fortë orëve të hershme të mëngjesit, por moti do të vjen duke u stabilizuar (edhe pse ftohtë dhe me acar) për shkak të rritjes së fuqishme të presionit atmosferik. Temperaturat maksimale do të fillojnë të rriten nga e diela.
Pra, para nesh një javë me mot mjaft dinamik dhe me reshje të shpeshta shiu dhe bore. Reshjet do të fillojnë të martën në disa zona të Shqipërisë dhe do të përfundojnë të shtunën me kalimin e të gjitha këtyre sistemeve të fuqishme që do të na sjellin reshje shiu, bore, erëra të fuqishme dhe pastaj ngrica.
Gjatë javës do të mundohemi të jemi më aktiv sepse do të kemi ndryshime të parametrave në modele dhe për çdo ndryshim do të njoftoheni me kohë. Nuk do të ketë ndryshime në sqarimin e përgjithshëm të cilën e dhamë, por gjithsesi ndryshime në disa nuanca mund të ketë.
Stuhi të forta dhe reshje priten në Evropë dhe shumë pjesë të Ballkanit por informacione tjera për këto dhe tjera në postimet tona të ardhshme./MeteoBallkan
