Këtë javë na presim prapë temperatura jashtëzakonisht të larta, por jo krejtësisht të pazakonshme sepse jemi në pikun e stinës më të nxehtë të vitit. Temperaturat do të kulmojnë në tërë rajonin dhe nuk do të jenë të rralla shifra 40 gradë Celsius në Shqipëri dhe Maqedoninë Veriore, madje edhe në Mal të Zi dhe mund të ndodhë edhe në Kosovë dhe Luginën e Preshevës.
Pra, temperaturat edhe në Kosovë rriten gjatë kësaj jave deri afër 40 gradë Celsius dhe mund të ndodhë edhe të preket shifra 40 në ndonjë pjesë të Republikës së Kosovës.
Moti i nxehtë po mbretëron edhe në Evropë, por atje janë të pranishme edhe stuhi të forta verore të cilat do të intensifikohen gjatë kësaj jave dhe gradualisht fillojnë të zhvendosen drejt jugut dhe lindjes.
Në mes të javës vazhdojnë rritja e temperaturave në viset tona, por njëkohësisht mund të fillojnë disa zhvillime të vranësirave, fillimisht në viset kodrinore-malore duke kushtëzuar ndonjë rrebesh lokal shiu me vetëtima dhe bubullimë. Shqipëria vazhdon me mot stabil dhe shumë të nxehtë, po ashtu edhe Maqedonia Veriore dhe Kosova, por me zhvillime të izoluara.
Me afrimin e fundjavës zhvillimet e vranësirave mund të vijnë duke u shpeshtuar. Përkundër vapës së madhe lokalisht do të ketë freski me rrebeshe shiu me vetëtima dhe bubullimë. Kjo do të shtojë zagushinë e ajrit, prandaj në ato rajone ku nuk ka rrebesh shiu do të jenë jashtëzakonisht nxehtë.
Pra, para nesh edhe një javë me vapë shumë të fortë verore. Në mesjave zhvillime të izoluara vetëm apo kryesisht në disa zona kodrinore-malore. Në fundjavë mund të kemi destabilizim më të fuqishëm të motit dhe ulje të temperaturave dhe atë kryesisht në Kosovë dhe Maqedoninë e Veriut, ngase Shqipëria ende mbetet nën “pushtetin rigjid” të anticiklonit afrikan.
Ishte ky parashikimi i motit për këtë javë dhe përgatituni për një valë shumë të fuqishme të nxehtësisë verore. Ndryshime të vogla në parashikim mund të ndodhin sidomos për kohën dhe fillimin e zhvillimit të stuhive të izoluara. Për çdo ndryshim eventual do të njoftoheni me kohë në postimet tona të përditshme./MeteoBallkan
