Nën kushte stabile anticiklonike do të përfundojë muaji Prill i këtij viti 2025. Temperaturat do të jenë tipike pranverore dhe tipike për këtë periudhë kohore.
Pra, dy ditët e fundit të muajit do të karakterizohen me stabilitet të plotë atmosferik sidomos në Kosovë dhe rrethinë, ndërsa disa zhvillime krejtësisht të pakta dhe të izoluara mund të ndodhin në jug të Shqipërisë dhe disa vise në Maqedoninë e Veriut ditën e Martë. Temperaturat do të rriten në tërë rajonin pas një jave jo-stabile, megjithatë në shumë zona mbesin prezente erërat e freskëta nga verilindja që pengojnë rritjen e ndjeshme të temperaturave.
Dita e parë e Majit do të karakterizohet po ashtu me mot kryesisht stabil dhe me diell, por disa zona të izoluara mund të kenë ndonjë zhvillim të ndonjë rrebeshi afatshkurtër shiu me ndonjë vetëtimë dhe bubullimë. Probabilitet më të lartë për ndonjë rrebesh shiu të Enjten do të ketë Lugina e Preshevës dhe verilindja e Maqedonisë së Veriut dhe atë kryesisht në zonat kodrinore-malore. Ndonjë rrebesh i izoluar mund të ndodhë edhe në ndonjë rajon tjetër, por në përgjithësi atmosfera do të jetë e qetë, me diell dhe stabile.
Temperaturat do të vazhdojnë të rriten edhe në fundjavë dhe nuk priten zhvillime të mëdha. Dita e dytë e Majit mund të krijojë kushte për stuhi të izoluara në Shqipëri dhe Maqedoninë Veriore.
Temperaturat në Kosovë do të rriten nga dita në ditë, por gradualisht dhe pritet të arrijnë deri në 26 apo 27 gradë Celsius në fundjavë, ndërsa në Shqipëri deri afër 30 gradë Celsius. Edhe në Maqedoninë Veriore do të jenë për dy apo tri shkallë më lartë se në Kosovë.
Fundjava vjen e ngrohtë dhe kryesisht me diell. Do të ketë gjasa për zhvillime të rrebesheve të izoluara me vetëtimë dhe bubullimë, por pa ndonjë impakt të madh në gjendjen e përgjithshme./MeteoBallkan
