Java filloi me vranësira dhe një front të dobësuar të ftohtë ajror që në Kosovë do të sjellë edhe reshje lokale, kalimtare bore mëngjesin e së martës, ndërsa në Shqipëri reshje e rrebeshe lokale shiu. Temperaturat u rriten paksa pas acarit të ditëve të kaluara dhe pritet të rriten përsëri.
Fronti i ftohtë i së martës do të ulë temperaturat përkohësisht, ndërsa të mërkurën do të kemi rritje të temperaturave.
Masa të fuqishme ciklonike që vijnë nga Atlantiku dhe shtrihen në Evropen veriperëndimore e qendrore do të zhvendosen gradualisht në drejtim të Gadishullit Ballkanik, ndërkohë që temperaturat rriten në mesjavë dhe parashihen e reshje e rrebeshe të herëpashershme shiu që të premten mund të jenë edhe me vetëtima dhe bubullimë.
Ne do të jemi në sektorin e ngrohtë të këtyre masave ciklonike deri ditën e Premte kur masa e fuqishme ajrore polare arrin të përfshijë edhe territoret tona me ulje të theksuara të temperaturave dhe reshje bore.
Pra, të martën në mëngjes me reshje lokale bore në Kosovë, ndërsa nga e mërkura me intervale kohore me diell e rritje të temperaturave. Të enjten riga lokale shiu e intervale kohore me diell. Reshjet lokalisht intensifikohen ditën e Premte pak para ardhjes së masës së ftohtë polare kur pastaj priten edhe reshje bore. Kësaj radhe mund të presim reshje paksa më intensive bore, megjithatë ende jo ashtu siç kemi dëshirë. Temperaturat do të shënojnë ulje të ndjeshme dhe priten edhe erëra të ftohta nga veriut.
Sa do të jetë sasia e borës dhe ku e kur saktësisht pritet të ketë borë është shumë e vështirë të dihet saktë nga tani, prandaj për të rejat sinoptike do ju lajmërojmë gjatë ditëve të javës.
Në Shqipëri reshje të herëpashershme, lokale shiu dhe shpeshherë edhe në formë të ndonjë stuhie me vetëtima dhe bubullimë. Këto stuhi do të jenë të karakterit lokal. Temperaturat po ashtu rriten dhe priten edhe intervale kohore me diell, ndërkohë që temperaturat ulen dukshëm afër fundjavës me reshje të reja shiu e reshje dëbore në pjesën lindore të vendit./MeteoBallkan
