Fronti dinamik solli pamje spektakolare në Republikën e Kosovën mbrëmë me reshje të dendura bore pas një mungese dy mujore ose tre mujore të borës. Në disa vise të ulëta në Kosovë bora e mbrëmshme ishte më e madhja këtë sezone me përjashtim të borës së 25 Nëntorit. Por, në viset e larta malore të Kosovës reshje të dendura bora pati edhe në Dhjetor dhe Janar.
Çfarë moti po na sjellë kalimi i këtij fronti dhe largimi i tij?
Një masë kalimtare ajrore anticiklonike sot po stabilizon atmosferën, por njëkohësisht kemi depërtimin e masave të fuqishme ciklonike nga Oqeani Atlantik në Mesdhe. Këto masa ciklonike nga Mesdheu zgjerohen shumë shpejtë drejt territoreve tona, prandaj stabilizimi i motit nuk do të zgjasë fare, por menjëherë të Martën do të kemi shtim të vranësirave e pasdite edhe reshje e rrebeshe shiu. Në Shqipëri priten lokalisht rrebeshe intensive me vetëtima dhe bubullimë.
Mëngjesi i së Martës mund të kushtëzojë ngrica kryesisht të dobëta deri në -1 gradë Celsius e në viset malore mund të jetë ndonjë shkallë më ftohtë. Duke falënderuar masën ajrore që vjen nga Mesdheu acari do të jetë i butë dhe nuk do të zgjasë shumë, prandaj mund të shpëtojmë me dëmtime minimale në vegjetacionin e hershëm. Normalisht do të ketë përjashtime.
E Marta e freskët e të Mërkurën rritje e mëtutjeshme e temperaturave kur priten intervale kohore me diell dhe erëra të ngrohta nga juglindja. Reshjet do të pushojnë përkohësisht, ndërkohë që një front ri me reshje e rrebeshe shiu afrohet nga deti i cili sjellë rrebeshe intensive në Shqipëri e mëngjesin e së Enjtes edhe në Kosovë.
Nga dita e Enjte presim përmirësim dhe stabilizim më të qëndrueshëm të atmosferës dhe njëkohësisht vazhdojnë rrymime të fuqishme ajrore nga jugu. Kjo nënkupton edhe erëra të ngrohta edhe rreze diellore dhe kjo do të jetë nisja e rritjes së ndjeshme të temperaturave.
Afrika Veriore drejton antenat direkt kah Ballkani
Një masë mjaft e ngrohtë ajrore me origjinë direkt nga Afrika veriore do të arrijë në viset tona në fund të kësaj jave dhe krejt në fillim të javës së re.
Të premten dhe për fundjavë na pret mot pranveror dhe veror me rritje të ndjeshme e konstante të temperaturave, rreze të shumta diellore dhe erëra nga jugu.
Temperatura në Kosovë maksimale të dielen pritet të arrijnë deri në 25 gradë Celsius, madje mund të ndodhë edhe 26 gradë Celsius. Në Shqipëri deri në 30 gradë Celsius.
Sigurisht se temperaturat rriten edhe në Maqedoninë Veriore mbi 25 gradë Celsius, Mal të Zi deri në 30 dhe Luginë të Preshevës po ashtu rreth 25 gradë Celsius maksimalja.
Pra, sivjet kemi të bëjmë me fillimin shumë të hershëm të pranverës, madje edhe verës dhe depërtime shumë të rralla të fronteve të ftohta me borë dhe kjo është pozitive për shumë kultura të hershme vegjetative, ndërkaq nuk duhet përjashtuar tërësisht mundësinë e ndonjë befasie afatshkurtër dimërore edhe gjatë muajit Prill, por të shpresojmë që nuk do të ndodhë/MeteoBallkan
