Fronti i ftohtë i së Dieles solli reshje shiu e dëbore në viset malore. Temperatura pësuan ulje të ndjeshme dhe për këtë arsye pritet të kemi acar të lehtë gjatë fillimit të javës së re.
Po ashtu kemi stabilizimin e plotë të motit për shkak të rritjes së fuqishme të presionit atmosferik pas frontit të ftohtë. Me këtë nënkuptojmë fuqizimin e mases ajrore të thatë anticiklonike, por kjo nuk është e tëra.
Pas stabilizimit të plotë të motit dhe dominimit absolut anticiklonik në drejtim të viseve tona do të fillojnë të depërtojnë masa të ngrohta ajrore me origjinë nga Afrika veriperëndimore dhe veriore. Si rrjedhojë e fuqizimit të këtyre masave ajrore, rrymimeve të fuqishme ajrore nga jugu dhe rrezeve intensive diellore do të kemi rritje të ndjeshme të temperaturave.
Temperaturat do të rriten në mënyrë graduale, më ndjeshëm nga mesi i javës ku pritet të kemi temperatura maksimale nga 15 deri në 20 gradë Celsius në Kosovë dhe Maqedoninë Veriore. Në Shqipëri edhe më ngrohtë.
Kjo është shenja e parë serioze e pranverës 2025.
Për fund fillimi i javës me acar të lehtë dhe pak më ftohtë. Mesi i javës dhe fundi i javës me rirtje të ndjeshme të temperaturave dhe pa reshje atmoferike. Pranverë e vërtetë.
Megjithë ardhjen e pranverës më të hershme të shpresojmë që vegjetacioni të mos “ngutet” shumë sepse mund të kemi ende ndonjë depërtim të vonshëm të ndonjë mase ajrore të ftohtë që do të mund të dëmtonte vegjetacionin e hershëm, por të shpresojmë që të mos ketë./MeteoBallkan
