Pas disa ditëve shumë të ftohta dhe me acar polar, temperaturat më në fund po shënojnë rritje graduale. Temperaturat kanë shënuar rritje që nga e Shtuna, por vetëm në shtresa më të larta atmosferike, ndërsa në sipërfaqe kemi pasur bllokimin e temperaturave mjaft të ulëta për shkak të fenomenit të inversionit të temperaturave për shkak të mjegullës dhe vranësirave të ulëta.
Kjo javë do të karakterizohet me mot të ndryshueshëm ku do të kemi alternime të shpeshta mes vranësirave e intervale kohore me diell. Nuk do të mungojnë reshjet atmosferike, të cilat megjithatë do të jenë të dobëta dhe të karakterit lokal. Mjegulla e cila pritet të shpërbëhet, por do të mbetet prezente herë pas here edhe gjatë kësaj jave sidomos orëve të natës dhe mëngjesit.
Reshje lokale shiu, shqote e bore priten të Martën, me mundësi edhe për shi të ngrirë. Reshjet do të jenë të dobëta, paksa më të theksuara në Shqipëri dhe viset kodrinore-malore.
E Mërkura vijon me mjegull në mëngjes dhe gjatë ditës me vranësira e intervale kohore me diell. Rrymimet ajrore do të fillojnë të jenë të fuqishme nga jugu dhe jugperëndimi. Temperaturat si ato minimale edhe ato maksimale rriten gradualisht pothuajse çdo ditë. Edhe përgjatë ditëve të javës nganjëherë do të ketë mundësi për ndonjë rigë afatshkurtër shiu, ndërsa të Premten mund të kemi depërtimin e një fronti të ftohtë ajror me mundësi për reshje më intensive shiu , por asgjë serioze.
Pas frontit rikthehet mjegulla, por kësaj radhe gjatë ditës parashihet të kemi intervale kohore me diell të cilat do të shkaktojnë rritje të ndjeshme të temperaturave.
Pra, një javë me mot të ndryshueshëm, me intervale kohore me diell dhe vranësira të shpeshta. Mjegulla edhe pse do të largohet pritet të rikthehet përsëri herë pas here sidomos mëngjeseve, megjithatë temperaturat shënojnë rritje për shkak të rrymimeve të fuqishme ajrore nga jugu dhe jugperëndimi. Reshjet atmosferike do të jenë prezente nganjëherë po jo në sasi të mëdha. Ndonjë goditje e re dimërore as që vjen në konsideratë. Temperaturat nga -2 deri në 12 gradë Celsius në Kosovë. Në Shqipëri dukshëm më ngrohtë pas shiut të së Martës./MeteoBallkan
