Edhe një javë mjaft e nxehtë në territoret tona, megjithatë në disa vise sot po fryjnë erëra paksa më të freskëta sidomos në Rrafshin e Kosovës dhe për këtë arsye ka ulje të lehta të temperaturave dhe këtë po e kushtëzojnë frontet e ftohta në veri të Ballkanit.
Sidoqoftë, këto fronte nuk do të kenë sukses në largimin e vapës dhe anticiklonit afrikan që ka gllabëruar viset tona. Edhe pse priten ulje të lehta të temperaturave dhe netë paksa më të freskëta, temperaturat do të rriten prapë me afrimin e fundjavës sidomos nga e Enjta.
Ulja e lehtë e temperaturave do të fillojë të ndjehet sot (e Hënë) në Kosovë, ndërsa në Shqipëri dhe Maqedoninë Veriore do të ndjehet nga e Marta. Pra, kemi dy tri-ditë me diell por jo ekstremisht të nxehta, me përjashtim të disa viseve të Shqipërisë, Maqedonisë së Veriut dhe ndoshta edhe Dukagjinit të Kosovës ku temperaturat do të ulen shumë pak.
Ajri i nxehtë afrikan gjithnjë i gatshëm për të depërtuar
Frontet e ftohta vazhdimisht do të bëjnë trysni nga veriperëndimi për të depërtuar në juglindje dhe për këtë arsye me afrimin e fundjavës temperaturat rriten, por njëkohësisht në disa zona rriten gjasat për rrebeshe lokale shiu me vetëtima dhe bubullimë, fillimisht në Mal të Zi, pastaj edhe në shumë zona të Kosovës.
Sipas ecurive aktuale sinoptike të Shtunën mund të kemi një destabilizim potencial të atmosferës në shumë pjesë të Kosovës dhe Maqedonisë së Veriut me rrebeshe lokale shiu me vetëtima dhe bubullimë.
Pra, deri të shtunën në Kosovë me diell dhe fillimisht jo shumë nxehtë, pastaj temperaturat rriten. Të shtunën mundësi për rrebeshe lokale shiu me vetëtima dhe bubullimë. Këto rrebeshe mund të paraqiten edhe në Maqedoninë Veriore, veri të Malit të Zi, Luginë të Preshevës dhe disa nga viset kontinentale të Shqipërisë.
Në zonat e rrebesheve ulje kalimtare të temperaturave.
Temperaturat do vazhdojnë të jenë mjaft të larta në tërë rajonin. Një freski e lehtë dy tri-ditët e para të javës në vendet e lartëpërmendura, pastaj temperaturat rriten prapë deri në 35 gradë Celsius në të gjitha zonat. Në viset më të nxehta të Shqipërisë dhe Maqedonisë së Veriut deri në 40 gradë Celsius.
Ishte parashikimi i motit për këtë javë dhe fillimin e Gushtit. Ndryshime në parashikim mund të ketë. Për çdo ndryshim eventual do të lajmëroheni në kohë në postimet tona të përditshme./MeteoBallkan
