Masa mjaft e ftohtë ajrore që erdhi nga lindja e Kontinentit solli reshjet e para të dëborës në shumë zona kodrinore-malore të Kosovës, ndërsa fjolla bore u paraqitën edhe në disa zona më të ulëta mbidetare, por jo nëpër ultësira, megjithatë reshjet ishin të pakta dhe kalimtare. Në shumë vise nuk pati fare reshje.
Masa e ftohtë ajrore ka krijuar një ciklon të shtresave të larta dhe kemi edhe një front të ftohtë me ardhje nga verilindja, pra një depërtim të një sasie të re të ajrit të ftohtë polar, por jo ndonjë gjë ekstreme. Në Mesdhe kemi “aktivitete ciklonike” dhe reshje atmosferike që nga Italia jugore në Greqi.
Një tjetër ciklon pritet të formohet dhe të sjellë reshje të reja atmosferike në viset tona natën e së mërkurës dhe mëngjesin apo ditën e Enjte kur priten reshje shiu të cilan në shumë pjesë të Kosovës do të shndërrohen në reshje bore, megjithatë nuk priten reshje bore në zonat më të ulëta të Dukagjinit, por mund të ndodhë që të mos ketë borë edhe në zonat më të ulëta të Anamoravës, por kjo mbetet ende enigmatike ngase këtu vendosin nuancat më të vogla dhe varet nga temperatura në momentin kur vijnë reshjet nga Mesdheu.
Në Shqipëri dhe Maqedoninë Veriore borë do të ketë vetëm në viset kodrinore – malore.
Sidoqoftë, para nesh një javë me shumë vranësira dhe rrymime ajrore të ftohta nga veriu. Reshje shiu në mes të javës të cilat në shumë pjesë të Kosovës do të shndërrohen në reshje shqote e bore. Reshjet nuk do të zgjasin shumë. Edhe pas reshjeve të borës vazhdojnë temperaturat e ulëta deri në fund të javës, por reshjet do të jenë të pakta dhe sporadike. Reshje më intensive pas të Enjtes priten në jug të Shqipërisë deri në pjesët qendrore.
Dita e Enjte mund të zbardhë shumë vise në Republikën e Kosovës dhe shumë vise kodrinore-malore të tërë rajonit. Nëpër ultësira të Kosovës aty ku bie bora nuk do të jetë aq e qëndrueshme, sepse krejt në fundjavë do të kemi rritje të temperaturave për shkak të rrymimeve të fuqishme që priten nga jugu.
Ishte ky parashikimi i motit për këtë javë. Për shkak të atmosferës dinamike mund të ketë ndryshime nga dita në ditë. Për çdo ndryshim do të njoftoheni në postimet tona të mbrëmjes dhe mëngjesit ose ditëve të javës.
Temperaturat në Kosovë afërsisht nga -5 deri në 10 gradë Celsius, ndërsa në Shqipëri nga -3 deri në 20 gradë Celsius. /MeteoBallkan
