Edhe një javë me dominim gati të plotë anticiklonik dhe kjo do të kushtëzojë edhe disa ditë të thata pa reshje atmosferike me disa përjashtime ku në disa rajone do të ketë gjasa për reshje të dobëta, afatshkurtra shiu.
Mjegulla do të vazhdojë të jetë e pranishme sidomos në zonat më të ulëta të viseve tona netëve dhe mëngjeseve, por në zona të caktuara edhe gjatë ditëve. Mund të ndodhe një shpërndarje e përkohshme e mjegullës të mërkurën në mesditë nga të gjitha zonat, megjithatë edhe nëse ndodhë mjegulla do të rithehet prapë pas të mërkurës apo afër fundit të javës.
Në aspektin termik temperaturat edhe gjatë kësaj jave nuk do të pësojnë ndonjë ndryshim të madh.
Netët dhe mëngjeset do të vazhdojnë të jenë të ftohta dhe në zonat me mjegull ftohtë do të jetë gjatë tërë ditës. Nga mesi i javës e tutje do të ketë një rritje të temperaturave sipas ecurive aktuale për shkak të masave ajrore pak më të ngrohta nga Mesdheu.
Pra, e tërë java do të karakterizohet me intervale kohore me diell, lokalisht mjegull për shkak të inversionit termik dhe kryesisht pa reshje atmosferike. Reshje të dobëta atmosferike në formë shiu kryesisht mund të ketë të mërkurën dhe atë vetëm në disa rajone në Kosovë dhe veri të Shqipërisë dhe më shumë në pjesë të Malit të Zi.
Pas dobësimit të anticiklonit të mërkurën dhe vranësirave kalimtare me reshje të dobëta lokale, të Enjten pritet fuqizim i menjëhershëm i masave stabile anticiklonike, por për fundjavë do të ketë dobësim të sërishëm të anticiklonit dhe masa ajrore ciklonike afrohen nga Mesdheu. Të dielën mund të ketë reshje lokale atmosferike të cilat sipas ecurive aktuale do të jenë të dobëta.
Temperaturat minimale do të zbresin deri në -3 apo -4 gradë Celsius, kurse maksimalet deri në 12 apo 13 gradë Celsius në Kosovë, kurse në Shqipëri normalisht do të jetë më ngrohtë në zonat mesdhetare.
Pra, edhe një javë e thatë dhe pa dimër, përpos zonave me mjegull ku do të jetë ftohtë dhe cilësiae ajrit do të jetë e dobët. Ka mundësi që disa ditë të ketë shpërndarje të mjegullës sidomos orëve të mesdites./MeteoBallkan
