Mbi rajonin tonë po mbretëron mot kryesisht stabil, me diell, por edhe me vranësira. Në disa pjesë të Kosovës ka edhe erëra jugore dhe jugperëndimore.
Ky stabilitet i kushteve sinoptike mundësohet nga dominimi anticiklonik i cili nuk do ta ketë gjatë sepse nga nesër nga Evropa kontinentale do të kemi depërtime të herëpashershme të masave ajrore jo stabile, apo fusha ajrore me presion të ulët atmosferik. Si rezultat pritet të fuqizohen erërat në shumë rajone, kurse vende-vende do të ketë edhe rrebeshe shiu me ndonjë vetëtimë dhe bubullimë.
Rrebeshet më të fuqishme gjatë ditës së nesërme priten në shumë rajone të Shqipërisë, kurse më të rralla dhe më të izoluara në Kosovë dhe Maqedoninë Veriore.
Edhe ditëve të ardhshme na pret mot i ndryshueshëm, por i nxehtë dhe me erëra herë pas here fuqishme jugore dhe jugperëndimore. Vende-vende do të ketë gjasa për ndonjë rigë apo rrebesh të izoluar shiu, kurse për fundjavë priten reshje apo rrebeshe shiu me vetëtima dhe bubullimë pothuajse në tërë rajonin tonë.
Përndryshe nëse shohim më gjerë në rajonin tonë Ballkanik ditët e ardhshme do të ketë stuhi dhe rrebeshe të fuqishme shiu me vetëtima, bubullimë dhe breshër sidomos në Serbi, Bosnjë dhe Hercegovinë, pjesë të Kroacisë dhe Sllovenisë.
Sezona e reshjeve verore apo pranverore (me shkarkime atmosferike) në Evrope dhe rajon ka filluar, por këto reshje si çdo sezonë më së pakti prekin Republikën e Kosovës, por të shpresojmë që sivjet të jetë më ndryshe./Meteoballkan
