Masa ajrore të ngrohta dhe stabile përshkuan gjatë fundjavës rajonin tonë dhe po ashtu edhe fillimi i javës së re.
Megjithatë në Gjirin e Gjenoves në Itali do të krijohet një ciklon i cili do të shkaktojë destabilizim të fuqishëm të motit në Ballkan sidomos në rajonet veriperëndimore të Ballkanit me stuhi të fuqishme shiu me vetëtima dhe bubullimë si dhe me reshje të shpeshta shiu e ulje të temperaturave.
Në viset tona temperaturat më të larta do të mbesin ende (rezistente) dhe stuhitë do të jenë të izoluara. Fillimisht në Shqipëri nesër do të ketë gjasa për zhvillimin e disa stuhive të fuqishme të izoluara me bubullima. Këto stuhi nuk do të kapin shumë territor dhe në Kosovë do të jenë edhe më të pakta.
Nga e mesi i javës masa destabilizuese me shi dhe rrebeshe me bubullima do të shtrihet më në jug duke përfshirë edhe shumë pjesë të Kosovës. Temperaturat do të shënojnë ulje sidomos pas rrebesheve të shiut.
Masat ajrore ciklonike do të mbesin të fuqishme dhe mbizotëruese edhe me afrimin e fundjavës dhe përkundër përmirësimit të përkohshëm të motit reshjet dhe rrebeshet e shiut do të rikthehen shumë shpejt sidomos të Premten dhe të Shtunën. Gjatë fundjavës na pret mot i ndryshueshëm as i ftohtë e as i nxehtë. Me vranësira, intervale kohore me diell dhe rrebeshe lokale shiu, vende-vende me vetëtima dhe bubullimë. Mes reshjeve do të ketë edhe intervale të gjata kohore me mot pa reshje.
Pra, në përgjithësi në Ballkan do të kemi reshje të forta dhe stuhi shiu. Këto reshje do të jenë më të pakta në territoret tona, megjithatë me lëvizjen e Ciklonit Gjenovian reshje të herëpashershme do të arrijnë edhe në viset tona. Fillimisht priten stuhi të izoluara me vetëtima dhe bubullimë, pastaj afër fundit të javës mund të kemi reshje shiu në të gjitha anët.
Vlen të potencohet parashikimi se disa nga këto stuhi gjatë kësaj jave mund të jenë mjaft të fuqishme.
Informacione dhe detaje tjera në postimet tona të ardhshme./MeteoBallkan
