Të Mërkurën në Kosovë do të vazhdojë të mbajë mot i vranët dhe me reshje të herëpashershme, lokale shiu. Në viset e larta malore reshje të herëpashershme bore. Pasdite në disa zona mund të ketë ndonjë interval kohor me diell, ndërsa reshjet vazhdojnë të izoluara. Temperatura maksimale parashihet të arrijë deri në 14 gradë Celsius.
Në Shqipëri, Maqedoninë Veriore, Luginë të Preshevës dhe Mal të Zi të Mërkurën pritet të mbajë mot me vranësira e riga lokale shiu, por në shumë zona edhe me intervale kohore me diell. Në jug të Shqipërisë mund të ketë rrebeshe afatshkurtra shiu me ndonjë vetëtimë dhe bubullimë. Temperaturat do të shënojnë rritje të lehta.
Të enjten pak më ngrohtë, me vranësira të shpeshta e intervale kohore me diell, por edhe me reshje lokale apo të izoluara.
Reshjet lokale do të vazhdojnë edhe të Premten dhe të Shtunën, të intensiteteve të ndryshme, por mund të ketë edhe intervale kohore me diell dhe rritje të lehta të temperaturave sidomos në kohën dhe vendet ku do të ketë intervale me diell.
Të dielën përkeqësim i mëtutjeshëm i motit, ulje e fuqishme e temperaturave dhe shiu do të shndërrohet në borë./MeteoBallkan
