Gjatë natës pritet kthjellim i pjesshëm i motit dhe depërtimi i ajrit mjaft të ftohtë në kombinim me kthjelltësinë do të kushtëzojë acar të fortë. Temperaturat pritet të ulen deri në -7 gradë Celsius, me mundësi që në viset malore të jetë edhe më ftohtë.
Të Dielën në Kosovë pritet të mbajë mot kryesisht me diell, por edhe me vranësira lokale. Mëngjesi me acar të fortë dhe me mundësi për mjegull dhe vranësira të ulëta në shumë lugina dhe ultësira. Gjatë ditës zbutje e acarit, por mbetet ende ftohtë, me temperatura maksimale nga 1 deri në 3 gradë Celsius.
Në Shqipëri, Maqedoninë Veriore, Luginë të Preshevës dhe Mal të Zi nesër pritet të mbajë mot me diell dhe vranësira të herëpashershme, lokale. Mëngjesi do të jetë shumë i ftohtë e sidomos në viset kontinentale pritet acar i fuqishëm. Vlen të theksohet veriu i Malit të Zi ku temperatura mund të ulet deri në -15 gradë Celsius.
Nga e hëna zbutje graduale e acarit dhe rritje graduale e temperaturave. Priten intervale kohore me diell dhe vranësira lokale, më të theksuara në Shqipëri. Vetëm në ato zona ku eventualisht mund të ketë përqendrim më të gjatë të mjegullës që do të pengojë rritjen e temperaturave deri në tërheqjen e saj. Në Shqipëri do të fillojnë herë pas here edhe reshje të lokalizuara shiu sidomos nga e marta. Ndonjë rigë shiu mund të bjerë edhe në Dukagjin./MeteoBallkan
