Nesër në Kosovë pritet të mbajë mot kryesisht me diell dhe i ngrohtë veror. Priten edhe vranësira lokale, por pa reshje atmosferike. Temperaturat do të fillojnë të rriten dukshëm dhe ajo maksimale pritet të arrijë deri në 29 apo 30 gradë Celsius.
Në Shqipëri, Maqedoninë Veriore, Luginë të Preshevës dhe Mal të Zi nesër pritet të mbajë mot me diell dhe vranësira lokale. Nën ndikimin dhe shtrirjen e masave më stabile ajrore anticiklonike moti do të stabilizohet në tërë territoret tona.
Fundjava tropikale
Fundjava vjen me rritje të temperaturave dhe ato maksimale parashihen mbi 30 gradë Celsius dhe kjo nënkupton fillimin e valës më të re të nxehtësisë tropikale.
Të dielën pasdite rrallë në disa zona mund të ketë zhvillim të ndonjë rrebeshi të izoluar shiu me vetëtima dhe bubullimë kryesisht në vise kodrinore-malore, ndërsa paksa më të përhapura mund të kemi të hënën orëve të pasdites. Temperaturat mbesin të larta./MeteoBallkan
