Nesër në Kosovë pritet të mbajë mot me intervale kohore me diell dhe vranësira të ciat do të vijnë duke u shtuar dhe intensifikuar. Reshjet e shiut së pari pritet të fillojnë në perëndim dhe veriperëndim të vendit e pastaj deri afër mbrëmjes pritet të shtrihen në gati krejt territorin e Republikës së Kosovës. Në viset malore priten reshje bore.
Në Shqipëri nesër pritet të mbajë mot mjaft jo-stabil. Gjatë ditës pritet të fillojnë reshjet e shiut të cilat në disa rajone pritet të jenë të dendura. Ka gjasa edhe për rrebeshe lokalisht të fuqishme shiu me vetëtima dhe bubullimë, sidomos në zonat bregdetare.
Reshje shiu nesër priten edhe në Mal të Zi, ndërsa në Maqedoninë Veriore dhe Luginën e Preshevës priten alternime mes vranësirave dhe intervaleve kohore me diell. Reshje lokale priten vonë në mbrëmje.
Të hënën na pret mot plotësisht i vranët dhe me reshje shiu. Në Shqipëri lokalisht priten reshje mjaft intensive shiu dhe rrebeshe shiu me vetëtima dhe bubullimë. Reshje shiu priten edhe në viset tjera. Me uljen e temperaturave pritet të rifillojnë reshjet e borës fillimisht në viset kodrinore-malore e pastaj edhe në disa ultësira./MeteoBallkan
