Nesër në Kosovë do të mbajë mot me diell, vranësira dhe mjaft i nxehtë. Erërat jugore dhe jugperëndimore do të fuqizohen pasdite dhe do të arrijë shpejtësinë maksimale rreth 60km/h veçanërisht në perëndim dhe qendër të vendit, por edhe në disa rajone tjera.
Në Shqipëri, Maqedoninë Veriore dhe Mal të Zi nesër do të mbajë mot me diell dhe vranësira si dhe me fuqizim gradual të erërave jugore në disa rajone. Do të jetë mjaft nxehtë.
Pasnesër do të kemi ardhjen e një fronti të fuqishëm të ftohtë ajror nga Skandinavia. Fillimisht gjatë ditës priten vranësira, ndërsa pasdite pritet të fillojnë edhe reshjet e shiut. Gjatë mbrëmjes do të kemi depërtimin e frontit të ftohtë dhe do të fillojnë të fryjnë erëra të fuqishme veriore të cilat do të kushtëzojnë ulje të theksuara të temperatura, reshje intensive shiu dhe reshje bore në viset kodrinore-malore fillimisht, pastaj edhe në shumë vise tjera të Republikës së Kosovës. Reshje bore priten në viset kodrinore-malore, ndërsa reshje të përziera në disa ultësira të Kosovës. Reshje bore do të ketë edhe në shumë pjesë të verilindjes së Shqipërisë si dhe në disa vise në lindje dhe juglindje të vendit. Reshje bore pritet të ketë edhe në viset kodrinore-malore të Maqedonisë së Veriut.
Në viset tjera të Shqipërisë priten reshje shiu të cilat do të jenë intensive në veri të vendit. Reshjet atmosferike pritet të pushojnë gjatë natës dhe mëngjesit të së mërkurës.
Të mërkurën na pret mot me vranësira, intervale kohore me diell dhe erëra mjaft të freskëta veriore.
Nga e enjta pritet stabilizim i plotë i motit dhe ngritje e theksuar e temperaturave./Meteoballkan
