Nesër në Kosovë do të mbajë mot i vërtetë pranveror, me rreze të shumta diellore dhe temperatura pranverore të cilat do të sillen rreth 20-22 gradë Celsius (maksimalet). Do të ketë erëra mesatare e në ndonjë rajon të fuqishme nga jugu dhe jugperëndimi të cilat do të qetësohen vonë në mbrëmje.
Në Shqipëri, Maqedoninë Veriore dhe Mal të Zi nesër do të mbajë mot i vërtetë pranveror dhe ngrohtë.
Pasnesër në Kosovë do të fillojë përkeqësimi i motit. Fillimisht do të fillojnë të fryjnë erëra veriore dhe kjo do të shënojë fillimin e depërtimit të masës së ftohtë ajrore nga verilindja dhe lindja e Kontinentit. Në orët e mbrëmjes do të fillojnë edhe reshje shiu të cilat shumë shpejt do të shndërrohen në reshje dëbore. Reshje pak më intensive do të ketë në juglindje dhe lindje të vendit si dhe në viset kodrinore-malore, kurse reshje më të pakta në rajonet tjera.
Edhe në Shqipëri, Maqedoninë e Veriut dhe Mal të Zi pasnesër do të ketë shtim të vranësirave por do të mbetet ngrohtë deri pasdite kur pritet të fillojnë reshjet e shiut. Vende-vende do të ketë edhe rrebeshe shiu me vetëtima dhe bubullimë, kurse gjatë natës do të fillojë të depërtojë ajri i ftohtë polar dhe priten edhe reshje bore në veri, verilindje, lindje dhe juglindje të Shqipërisë si dhe në Maqedoninë e Veriut dhe veriun e Malit të Zi. Reshje shumë të pakta do të ketë në veriperëndim të Shqipërisë.
Të hënën dhe të martën do të kemi mot dimëror. Herë pas here dhe vende-vende me reshje dëbore veçanërisht në viset kontinentale të rajonit, kurse në viset bregdetare do të jetë kryesisht thatë./Meteoballkan
