Sot në Kosovë do të mbajë mot i vranët dhe vende-vende me reshje shiu të intensitetit kryesisht të dobët. Do të ketë erëra mesatare deri të fuqishme nganjëherë nga verilindja.
Në Shqipëri do të mbajë mot i vranët dhe kryesisht i thatë. Në disa rajone mund të ketë reshje të dobëta shiu. Reshje pak më intensive shiu do të ketë në Maqedoninë Veriore gjatë ditës së nesërme.
Nesër në tërë rajonin do të kemi mot të vranët dhe vende-vende me erëra të fuqishme nga lindja dhe verilindja. Do të jetë freskët dhe me mundësi për riga të dobëta shiu, ose fjolla të dobëta bore në viset malore. Pasdite vonë do të ketë kthjellim të motit, kurse gjatë natës në të hënën mund të ketë edhe ngrica të dobëta.
Nga e hëna e tutje na pret mot kryesisht me diell, pra i kthjellët. Do të kemi edhe ngritje graduale të temperaturave, por erërat lindore dhe verilindore (herë pas here dhe vende-vende të fuqishme) do të jenë ende prezente gjatë ditës./Meteoballkan
