Sot në Kosovë na pret mot i ftohtë dimëror dhe me reshje bore në tërë territorin e vendit. Pritet të ketë reshje të intensitetit të ndryshëm, ndërsa herë pas here në shumë rajone priten reshje të dendura bore. Në tërë territorin pritet të krijohen shtresa bore, madje në shumë zona edhe solide duke përfshirë edhe ultësirat.
Temperaturat shënojnë ulje të ndjeshme dhe do të fryjnë erëra të ftohta nga veriu të cilat në raste të caktuara mund të jenë të stuhishme dhe të krijojnë orteqe bore sidomos në zonat kodrinore-malore.
Në Shqipëri, Maqedoninë Veriore, Luginë të Preshevës dhe Mal të Zi pritet të mbajë mot plotësisht i vranët dhe me reshje të dendura bore. Në perëndim të Shqipërisë në përgjithësi priten reshje shiu, ndërsa në lindje reshje mjaft intensive bore. Ka shanse që fjolla bore të ketë edhe në disa zona mesdhetare apo edhe bregdetare si në Shkodër, Lezhë, madje ka disa shanse që ndonjë fjollë bore të bjen edhe në Tiranë në fund të reshjeve. Në viset malore në veri dhe lindje të Shqipërisë dhe perëndim të Maqedonisë së Veriut priten stuhi të forta bore.
Reshje të dendura bore priten në gati tërë Maqedoninë e Veriut si dhe në Luginën e Preshevës dhe veri e qendër të Malit të Zi.
Të dielën reshjet pushojnë dhe do të kemi shansin të përjetojmë “bardhësi të pastërt” ose peisazhe dimërore në gati tërë Kosovën, Maqedoninë Veriore dhe Shqipërinë kontinentale, normalisht edhe në Luginë të Preshevës dhe veri e qendër të Malit të Zi. Temperaturat do të jenë dimërore, por priten rreze diellore. Në mbrëmje acar i fortë polar.
Bora do të jetë e qëndrueshme për shkak të acarit të fortë në mëngjes dhe në mbrëmje. Në mesdite të hënën temperaturat mund të dalin në “plus”.
Ditëve të ardhshme nuk priten reshje të mëdha atmosferike, por priten luhatje të shpeshta të temperaturave./MeteoBallkan
