Sot si në Kosovë, poashtu edhe në Maqedoni dhe Shqipëri do të vazhdojë të mbajë mot kryesisht me diell dhe stabil. Do të jetë relativisht nxehtë për këtë periudhë kohore por pak më ftohtë se ditët që lamë pas. Do të kemi erëra të lehta dhe mesatare nga lindja dhe juglindja.
Fushat e fuqishme ajrore të thata anticiklonike kanë shtrirë ndikimin e tyre për një kohë mjaft të gjatë mbi rajonin tonë duke penguar masat e lagshta ajrore të depërtojnë tek ne. Kjo gjendje është si pasojë e rrymave të dobëta ajrore. Anticikloni shumë i fuqishëm me qendër në Rusi dhe Ukrainë përbënë bllokadë totale për depërtimin e ndonjë mase ajrore të ftohtë ose të lagshtë në drejtim të rajonit tonë.
Kjo gjendje sinoptike do të vazhdojë edhe ditëve të ardhshme dhe në këtë mënyrë monotonia e stërgjatur meteorologjike do të vazhdojë edhe më tutje. Sidoqoftë, ky mot i mirë është i mirëseardhur për ata që i frikësohen dimrit dhe temperaturave të ulëta por asesi nuk është i mirëseardhur për ata që meren me bujqësi sepse ka një kohë të gjatë që nuk kemi reshje atmosferike dhe shpresojmë që kjo të ndryshojë në një të ardhme jo të largët edhe pse ende nuk ka shenja serioze për ndonjë ndryshim eventual./Meteoballkan
