Sot në Kosovë pritet të mbajë mot me vranësira e intervale kohore me diell. Temperaturat do të vazhdojnë të jenë ekstremisht të larta për këtë periudhë kohore, nga 2 ajo minimale deri në 19 gradë Celsius ajo maksimale. Erërat do të vazhdojnë (vende-vende nganjëherë) të jenë të fuqishme kryesisht nga jugu dhe jugperëndimi.
Reshje lokale shiu mund të ketë në zonën e Dukagjinit.
Në Shqipëri, Maqedoninë Veriore, Luginë të Preshevës dhe Mal të Zi pritet të mbajë mot me vranësira e intervale kohore me diell. Do të vazhdojnë erërat nganjëherë të fuqishme nga jugu. Reshje shiu priten vetëm në Mal të Zi dhe me mundësi edhe në veri të Shqipërisë.
E diela shënon afrimin e ciklonit masiv i cili do të kushtëzojë rrebeshe intensive shiu me vetëtima dhe bubullimë dhe kjo vlen për shumë vise të Shqipërisë dhe Malit të Zi. Në Kosovë reshjet do të jenë më të pakta dhe më të lokalizuara, megjithatë lokalisht priten rrebeshe me ndonjë vetëtimë dhe bubullimë. Rrebeshe lokale shiu të dielën priten edhe në Maqedoninë Veriore ndërkohë që në tërë rajonin vazhdojnë rrymimet shumë të fuqishme ajrore nga jugu. Lokalisht priten erëra mjaft të fuqishme edhe në sipërfaqe nga jugu dhe juglindja.
Në fillim të javës na pret mot me vranësira e intervale kohore me diell. Lokalisht priten reshje shiu e në viset malore fjolla bore./MeteoBallkan
