Sot në Kosovë do të mbajë mot i vranët, kurse pasdite pritet të fillojnë edhe reshjet e shiut. Në orët e mbrëmjes priten reshje intensive shiu dhe bore në viset kodrinore-malore për shkak të depërtimit të frontit të ftohtë ajror nga veriu. Reshje bore pritet të ketë edhe në disa qytete apo qyteza të Republikës së Kosovës. Para ardhjes së frontit do të jetë relativisht ngrohtë dhe natyrisht pas depërtimit të frontit do të ketë ulje të temperaturave dhe erëra të ftohta veriore të cilat do të shoqërojnë reshje e shiut, borës ose reshjet e përziera.
Edhe në Shqipëri sot pritet të mbajë mot i vranët, kurse pasdite priten edhe reshje shiu, vende-vende intensive. Mund të ketë edhe rrebeshe të fuqishme lokale shiu me vetëtima dhe bubullimë sidomos në veri-qendër të Shqipërisë. Në veri dhe verilindje të vendit do të ketë edhe reshje bore, lokalisht edhe në lindje dhe juglindje.
Edhe në Maqedoninë Veriore sot pasdite priten reshje shiu, kurse në mbrëmje në viset kodrinore-malore mund të ketë edhe reshje bore. Reshje intensive shiu priten nesër në Mal të Zi, kurse në veri të vendit priten reshje intensive bore.
Të mërkurën në tërë rajonin na pret mot i ftohtë në krahasim me ditët paraprake. Pritet kthjellim i motit, por do të jetë mjaft freskët dhe me erëra veriore.
Mëngjesi i së enjtes do të jetë mjaft i ftohtë dhe me mundësi edhe për ngrica për shkak se pritet kthjellim i plotë i motit dhe qetësim i tërësishëm i erërave dhe kjo mund të favorizojë brymën.
Gjatë ditës së enjte pritet stabilizim i plotë i motit dhe ngritje e theksuar e temperaturave. Ajri polar do të largohet përfundimisht dhe në rajon do të depërtojnë masa të ngrohta ajrore nga Mesdheu. /Meteoballkan
