Dita e nesërme (E diele) në Kosovë dhe rajon do të karakterizohet me mot plotësisht stabil, me intervale kohore me diell dhe vranësira lokale. Mëngjesi mund të jetë me mjegull nëpër disa lugina, kurse dita e këndshme dhe stabile. Temperaturat në Kosovë pritet të arrijnë deri në 10 gradë Celsius, në Shqipëri deri në 17 gradë Celsius.
Fillimi i javës së re do të na sjellë një front mjaft të fuqishëm të ftohtë ajror nga veriu. Një ciklon shumë i fuqishëm me qendër në Skandinavi do të zgjatet me lugun e tij barik deri në trojet tona duke shkaktuar destabilizim të fuqishëm të motit. Si rezultat pritet erëra, vende-vende të forta nga jugperëndimi para frontit. Me ardhjen e frontit do të fillojnë të fryjnë erëra të fuqishme nga veriut dhe reshjet e shiut do të shndërrohen në reshje bore. Temperaturat shënojnë ulje pas frontit të ftohtë, ndërsa dita e martë do të karakterizhet me erëra të fuqishme nga veriu dhe reshje lokale bore.
Nga e mërkura nga Mesdheu do të vijnë masa ajrore stabile anticiklonike. Pritet stabilizim i plotë i motit dhe rritje e temperaturave./MeteoBallkan
