Masat ajrore stabile anticiklonike kanë dominuar motin në rajonin tonë këtë javë ashtu siç kemi shkruar edhe të dielën. Mëngjeset ishin mjaft të ftohta dhe kishim edhe brymën apo acarin e parë për këtë sezonë. Po ashtu në shumë lugina të rajonit kishim edhe mjegull të dendur në orët e hershme të mëngjesit por gjatë orëve të paradites së hershme mjegulla tërhiqej për ti lëshuar rrugë rrezeve të këndshme diellore.
Nesër (e Premte) dhe pasnesër do të jetë kulmi i ndikimit afrikan dhe anticiklonik. Pasnesër vonë masa ajrore jo-stabile dhe të freskëta me origjinë nga Atlantiku do të fillojnë të depërtojnë gradualisht mbi rajonin tonë duke kushtëzuar shtim të vranësirave dhe vende-vende edhe reshje shiu. Nuk pritet i ftohtë i madh ose reshje të mëdha për momentin, por thjeshtë një ndjesi tipike vjeshte me vranësira, intervale kohore me diell dhe riga shiu, kështu që sot, nesër dhe pasnesër do të kemi mot ideal dhe të këndshëm gjatë ditës. Nga e shtuna vonë dhe të dielën pritet ndryshim i motit, por jo i madh./Meteoballkan
