Familja e një alpinisti të ri britanik, i cili u zhduk në malin Everest 100 vjet më parë, ka hequr dorë nga shpresa për të mësuar ndonjëherë ndonjë gjë për fatin e tij. Megjithatë, një çizme që një ekip alpinistësh e gjetën në këtë mal muajin e kaluar ka dhënë disa përgjigje.
Çizmja u zbulua pasi ishte shkrirë akulli në akullnajë, shkruan BBC .
Besohet se i përket Andrew Comyn “Sandy” Irwin, i cili u zhduk gjatë përpjekjes për t’u ngjitur në Everest në qershor 1924 me kolegun e tij George Mallory.
Për më tepër, mund të ndihmojë në zgjidhjen e një prej mistereve më të mëdha të alpinizmit : nëse dyshja ia dolën apo jo të bëheshin njerëzit e parë që ngjitën Everestin, 29 vjet përpara se Edmund Hillary dhe Tenzing Norgay të arrinin majën.
Aventurieri i njohur Jimmy Chin, i cili drejtoi ekipin e National Geographic, e cilësoi këtë zbulim si një “moment monumental dhe emocional”.
Por për stërmbesën e Irwin-it, Julie Summers, ishte thjesht “e mahnitshme”.
“Të gjithë hoqëm shpresën se do të gjendej ndonjë gjurmë e tij”, tha ajo për BBC.
Një numër njerëzish kanë kërkuar për vite me radhë trupin e Irwin-it, pjesërisht sepse 22-vjeçari dyshohet se mbante një aparat fotografik me film të pazhvilluar brenda, që mund të përmbante foto të të dyve në majë të malit.
A mund të jetë zbulimi i çizmes hapi i parë drejt gjetjes së trupit të tij – dhe kamerës?
Familja tani ka siguruar një mostër të ADN-së për të konfirmuar se ajo është me të vërtetë e Irwin-it, por ekipi i National Geographic ka shumë besim se i përket alpinistit.
Çorapja brenda çizmes ka një etiketë të qepur me emrin “AK Irwin”.
Gjatë rrugës, ata gjetën një shishe oksigjeni të shënuar me datën 1933. Një ekspeditë në Everest atë vit gjeti një send që i përkiste Irwin.
I nxitur nga kjo shenjë e mundshme se trupi i Irwin-it mund të jetë afër, ekipi e kontrolloi akullnajën për disa ditë, përpara se njëri prej tyre të shihte një çizme që dilte nga shkrirja e akullit.
Ishte një zbulim i rastësishëm – ata vlerësuan se akulli ishte shkrirë vetëm një javë para zbulimit të tyre.
Për pasardhësit e Irwin-it, zbulimi ishte emocional – veçanërisht në këtë, njëqindvjetorin e zhdukjes së tij.
Summers u rrit duke dëgjuar histori për vëllain e vogël aventurier të gjyshes së saj, të arsimuar në Oksford, i njohur si “Uncle Sandy”.
“Gjyshja ime kishte një foto të tij pranë shtratit deri në ditën që vdiq”. “Ajo tha se ai ishte një burrë më i mirë se kushdo ndonjëherë,” kujton ajo.
Irwin i lindur në Birkenhead ishte vetëm 22 vjeç kur u zhduk dhe ishte anëtari më i ri i një ekspedite që ka intriguar botën e alpinizmit për një shekull.
Ai dhe Mallory u panë të gjallë për herë të fundit më 8 qershor 1924 kur u nisën.
Një alpinist amerikan e gjeti trupin e Mallory në 1999. Në dekadat e fundit, kërkimi për eshtrat e alpinistit është zhytur në polemika mbi dyshimet se trupat ishin zhvendosur.
Por, çka nëse tani do të mund të vërtetohej se Irwin dhe Mallory kishin arritur majën, duke u bërë të parët që e bënë këtë – një ide që, pranon Summers, “do ta kthente mbi kokë historinë e alpinizmit”?
“Do të ishte mirë – të gjithë do të ndiheshim shumë krenarë”. “Por familja e mbante gjithmonë misterin dhe historia se sa larg arritën dhe sa të guximshëm ishin ishte në të vërtetë ajo që ishte e rëndësishme për ne”, tha ajo.
Sido që të jetë, tha ajo, “e vetmja mënyrë që ne do ta dimë ndonjëherë është nëse gjejmë imazhin e kamerës që ai besohet të ketë mbajtur”.
Siç dyshon ajo, kërkimi tani do të vazhdojë për atë kamerë, tha ajo.
Se a do të gjendet ajo mbetet për t’u parë.
