Masa të ftohta ajrore me origjinë polare kanë depërtuar shumë shpejtë në viset tona pas frontit të ftohtë ajror të së Hënës, ndërkohë që moti po kthjellohet dhe gjatë natës dhe mëngjesit të hershëm pritet mot pothuajse plotësisht i kthjellët acari është i paevitueshëm.
Disa vranësira të pakta lokale mund të mbesin dhe ato mund të ndikojnë që acari të jetë më i butë në ato rajone ku ato mbulojnë hapësirën. Në përgjithësi pritet kthjellim i motit dhe kombinimi i kthjelltësisë dhe masave të ftohta ajrore do të sjellë acar në pjesën më të madhe të territorin të Republikës së Kosovës dhe Maqedonisë së Veriut e Luginës së Preshevës, por edhe në shumë, shumë pjesë të Shqipërisë dhe Malit të Zi.
Temperaturat në Kosovë pritet të luhaten nga -2 deri në -6 gradë Celsius. Ngjashëm edhe në Maqedoninë e Veriut, por në viset e larta malore ato mund të shkojnë edhe nën -10 gradë Celsius.
Prandaj, gjatë natës dhe mëngjesit të hershëm të së Mërkurës kush mundet të ketë kujdes për pemët dhe perimet e hershme apo në përgjithësi për vegjetacionin e hershëm deri në lindjen e diellit.
Temperaturat pritet të rriten menjëherë duke filluar nga e Mërkura (mesdita) por mbetet ende potencial për acar edhe mëngjesin e së Enjtes eventualisht të Premtes, normalisht acar dukshëm më i butë sidomos të Premten./MeteoBallkan
